༈ བཀའ་བརྒྱུད་སྨོན་ལམ་སྐབས་སོ་བརྒྱད་པ་གནས་སྐབས་ཕྱིར་འགྱངས་ཀྱི་གསལ་བསྒྲགས།

བཀའ་བརྒྱུད་སྨོན་ལམ་ཐེངས་སོ་བརྒྱད་པའིི་སྔོན་འགྲོའི་གསུང་ཆོས་དང་། དངོས་གཞི་སྨོན་ལམ་དེ་བཞིན་ཕྱི་ལོོའི་ཟླ་བ་དང་པོའི་ཚེས་ ༢༡ ནས་ ༢༧ བར་དང་། མར་མེའི་སྨོན་ལམ་ཕྱི་ལོ་ ༢༠༢༡ ཕྱི་ཟླ་དང་པོའི་ཚེས་༢༨ ཉིན་གཏན་འཁེལ་ཟིན་པའི་དྲིལ་བསྒྲགས་སྔོན་སོང་ལྟར་ཡིན་མོད།

ཀུན་གྱིས་དགོངས་མངའ་ལྟར་འདི་ལོ་ཏོག་དབྱིབས་རིམས་ནད་གདུག་པ་ཅན་དེ་ཉིད་འཛམ་གླིང་རྒྱལ་ཁབ་ཀུན་ཏུ་ཁྱབ་གདལ་དུ་སོང་བས་སྐྱེ་བོ་ས་ཡ་དུ་མ་ནད་ཀྱིས་མནར་བ་དང་། འབུམ་ཕྲག་དུ་མའི་ཚེ་སྲོག་ཕྲོགས་སྟབས་རྒྱལ་སྤྱིའི་ཁྱོན་ཀུན་ཏུ་འགྲུལ་བཞུད་འགོག་སྡོམ་དང་། རྒྱལ་ཁབ་སོ་སོའི་ནང་དུའང་ཕན་ཚུན་འགྲོ་བསྐྱོད་བྱ་རྒྱུར་དཀའ་ཚེགས་ཤིན་ཏུ་ཆེ་བར་བརྟེན། གོང་གསལ་གཏན་འབེབས་བྱས་པའི་དུས་ཚོད་ཐོག་གནས་མཆོག་རྡོ་རྗེ་གདན་དུ་བཀའ་བརྒྱུད་སྨོན་ལམ་འཚོག་རྒྱུ་དེ་རེ་ཞིག་ཕྱིར་འགྱངས་མི་བྱ་མཐུ་མེད་དུ་གྱུར།

འོན་ཀྱང་རྗེས་སོར་ནད་ཡམས་དེ་བཞིན་གང་འཚམས་ཞི་འཇམ་དུ་གྱུར་ཏེ། མང་ཚོགས་འདུ་འཛོམས་ཆོག་པའི་གནས་སྟངས་བཟང་དུ་གྱུར་མཚམས་བསྐྱར་དུ་དུས་ཚོད་གཏན་འབེབས་ཞུ་རྒྱུ་ཡིན་ན། དེ་དོན་ཀུན་གྱིས་ཐུགས་ངེས་ཡོང་བ་དང། མཁའ་མཉམ་སྐྱེ་འགྲོ་ཐམས་ཅད་ནད་མེད་བདེ་བའི་དཔལ་ལ་ལོངས་སུ་སྤྱོད་པའི་ཐུགས་སྨོན་གང་དྲག་སྐྱོང་གནང་ཡོང་བའི་ཞུ་བསྐུལ་བཅས།

བཀའ་བརྒྱུད་སྨོན་ལམ་གྲ་སྒྲིག་ཚོགས་པ་ནས། སྤྱི་ལོ་ ༢༠༢༠ ཟླ་ ༩ ཚེས་ ༡༥ ཉིན་ཕུལ།

 

གནས་མཆོག་རྡོ་རྗེ་གདན་ནི་དུས་གསུམ་གྱི་སངས་རྒྱས་ཐམས་ཅད་མངོན་པར་རྫོགས་པར་འཚང་རྒྱ་གནས་ཁྱད་པར་ཅན་ཞིག་ཡིན་སྟབས།ཐེག་པ་ཆེ་ཆུང་སྔགས་དང་བཅས་པའི་ནང་པ་སངས་རྒྱས་པའི་རྗེས་འཇུག་ཡིན་ནོ་ཅོག་གི་ཕྱག་མཆོད་འབུལ་བྱ་ཡུལ་གྱི་བསྟི་གནས་ཁྱད་པར་ཅན་ཞིག་ཡིན། དེས་ན་བོད་བརྒྱུད་ནང་བསྟན་གྱི་ཆར་གཏོགས་པ་ས་དགེ་བཀའ་རྙིང་རིས་སུ་མ་མཆིས་པའི་གྲུབ་མཐའ་ཀུན་གྱིས་རང་རང་གི་སྨོན་ལམ་རྒྱུན་དུ་ཚོགས་མུས་ཡིན། དེ་བཞིན་རང་རེ་བཀའ་བརྒྱུད་པ་ལ་མཚོན་ནའང་ཐོག་མར་ཕྱི་ལོ་ ༡༩༨༣ ལོར་ཞི་བར་གཤེགས་པ་༧སྐྱབས་རྗེ་ཀ་ལུ་རིན་པོ་ཆེ་མཆོག་ནས་དབུ་འཛུགས་བསྐྱངས་རྟིང་། ༧སྐྱབས་རྗེ་འབོ་དཀར་རིན་པོ་ཆེ་མཆོག་ནས་དེ་ཉིད་ཀྱི་རྒྱུན་བསྐྱངས། དེ་བཞིན་ད་བར་བཀའ་བརྒྱུད་སྨོན་ལམ་ཐེངས་སོ་བདུན་བར་ཚོགས་ཟིན་ཅིང་། དེ་ལྟར་བྱ་དགོས་དོན་ནི་འཇིག་རྟེན་ཀུན་ཏུ་ནད་མུག་འཁྲུག་རྩོད་མཐའ་དག་རྨེག་མེད་དུ་ཞི་སྟེ། རྒྱལ་བསྟན་དར་ཞིང་། འགྲོ་ཀུན་བདེ་བའི་སྨོན་འདུན་ཟབ་མོ་རྒྱུན་དུ་བྱེད་མུས་ཡིན།

༄༅། །གྲུབ་ཐོབ་ཐང་སྟོང་རྒྱལ་པོའི་རྡོ་རྗེའི་གསུང་ནད་ཀྱི་འཇིགས་པ་ཞི་བའི་གསོལ་འདེབས་ས་སྐྱ་ནད་གྲོལ་མ་ནི།