དཔལ་༸རྒྱལ་དབང་ཀརྨ་པའི་དགོངས་གཞི་ལྟར་དཔལ་མཉམ་མེད་འགྲོ་མགོན་བཀའ་བརྒྱུད་པའི་རིས་མེད་འཛམ་གླིང་ཞི་བདེའི་སྨོན་ལམ་ཆེན་མོའི་འཚོགས་སྐབས་ལོ་ལྟར་སྐྱེ་འགྲོ་རྣམས་ནད་མེད་ཡུན་དུ་འཚོ་ཕྱིར་ཉམ་ཐག་དུད་འགྲོའི་སྨན་བཅོས་དང་། ནད་མནར་བ་ཀུན་ལ་སྨན་བཅོས་ཀྱི་ཕྱིར་སྨན་པ་གདན་དྲངས་ཏེ་རྒྱ་སྨན་དང་བོད་སྨན་གྱི་སྨན་བཅོས་སོགས་རིས་མེད་སྨན་བཅོས་གནང་དང་གནང་བཞིན་ཡོད་པ་ལྟར། རྡ་ས་ནོར་གླིང་ཉེ་འགྲམ་ཁྱུ་གསར་སྨན་ཁང་གི་སྨན་པ་ཁྱུ་གསར་སྐལ་ཆོས་ལགས་དང་ཁོང་གི་སྐུ་ཟླ་ཁྱུ་གསར་རྣམ་རྒྱལ་ལགས་གཉིས་སྔར་ནས་ཡོང་བཞིན་ཡོད་ན་ཡང་། འདི་ལོ་ཁོང་གི་སྐུ་ཟླ་ལས་བྲེལ་གྱིས་ཁོམ་སྐབས་མེད་རྐྱེན་གསོ་རིག་བརྟག་ཐབས་རིག་པ་ཆེད་སྦྱོང་བ་སྨན་པ་སྐྱིད་ལུས་ལགས་ཕེབས་རོགས་ཞེས་རེ་ཞུས་ལྟར་ཁོང་གཉིས་ཕེབས་ཏེ་འདི་གར་བཀའ་བརྒྱུད་སྨོན་ལམ་ཚོགས་ཁང་གི་རྒྱབ་ཕྱོགས་སུ་སྨན་བཅོས་བྱེད་བཞིན་འདུག །སྨན་པ་ལགས་ལ་སྨོན་ལམ་སྐབས་སྨན་བསྟེན་མཁན་ཇི་ཙམ་བྱུང་ཡོད་མེད་དང་། དེ་དག་གི་ན་ཚ་གཙོ་བོ་གང་ཡིན་མིན། ནད་པ་རྣམས་ལ་ཕན་ཐོགས་གང་འདྲ་བྱུང་མིན་བཀའ་འདྲི་ཞུས་པར།
སྨོན་ལམ་སྔོན་འགྲོའི་གསུང་ཆོས་དང་སྨོན་ལམ་དངོས་གཞིའི་སྐབས་སྨན་པར་དངོས་སུ་བསྟེན་མཁན་ནི་བོད་དང་ཧི་མཱ་ལ་ཡའི་རི་རྒྱུད་གཅིག་པུ་མ་ཡིན་པར་རྒྱ་གར་གྱི་ཡུལ་མི། རྒྱ་ནག་སྐམ་ས་ཆེན་མོ་ནས་ཡོང་བའི་རྒྱ་རིགས། ཐེ་ཝན་དང་མ་ལེ་ཤེ་ཡ། ར་ཤི་ཡ་སོགས་རྒྱལ་ཁབ་འདྲ་མིན་སྣ་ཚོགས་ནས་ཕེབས་པའི་ནད་པ་ཆིག་སྟོང་ལྔ་བརྒྱ་ལྷག་བྱུང་ཡོད་སྐོར་གསུངས་བྱུང་།
དེ་དག་གི་ན་ཚའི་སྐོར་གསུངས་སྐབས་སྤྱིར་ནད་པར་ནད་གཞི་འདྲ་མིན་ཡོད་མོད་ཀྱང་ད་ལྟ་འདིར་སླེབས་མཁན་མང་ཆེ་བ་གྲུམ་བུ་དང་། ཕོ་བའི་ནད་གཞི། མངར་མོའི་ན་ཚ། རྩ་གྲིབ། ཁྲག་ཤེད་ན་ཚ་སོགས་རེད་ཅེས་དང་།
ནད་པ་ལ་ཕན་ཐོགས་གང་འདྲ་བྱུང་མིན་སྐོར་གསུངས་སྐབས།
སྨན་ཁང་འདི་བཙུགས་ནས་བཟུང་ད་བར་དཔེ་མི་སྲིད་པའི་ཕན་ཐོགས་ཆེན་པོ་བྱུང་། སྔར་སྨན་བསྟེན་ཟིན་པ་རྣམས་ལ་ཕན་ཐོགས་ཆེན་པོ་བྱུང་སྟེ་ཁོང་ཚོས་ནད་པ་གསར་པ་མང་པོ་ཁྲིད་འོང་བཞིན་འདུག །ཁོང་ཚོས་བོད་སྨན་ཟོས་པ་ཙམ་གྱིས་སྨན་གཞན་ཟོས་པ་དང་མི་འདྲ་བར་གཟུགས་པོ་ཧ་ཅང་བདེ་ཐང་དུ་འགྱུར་བཞིན་འདུག་ཅེས་བརྗོད་མོད། བོད་ཀྱི་སྨན་ལ་བྱིན་རླབས་ཡོད་བསྡད་པ་རེད་འདུག་སྨན་དུས་ཡུན་རིང་ཙམ་སྤྲད་རོགས་གྱིས་བརྗོད་ཀྱི་འདུག །རྒྱལ་ཁབ་གཞན་གྱི་མི་ཡིན་ན་ཡང་བོད་སྨན་ལ་ཧ་ཅང་དགའ་མོས་བྱེད་བཞིན་འདུག །ཁོང་ལ་བསྟེན་གཏུག་བྱེད་མཁན་དངོས་སུ་སྨན་ཁང་ལ་ཡོང་ཁོམ་མིན་ཡོད་མཁན་རྣམས་ཇ་འཐུང་སྐབས་དང་། ཞལ་ལག་མཆོད་སར། ལམ་དུ་བསྐྱོད་སྐབས་སོགས་གང་དུ་ཐུག་ནའང་རྩ་བལྟ་རོགས་ཟེར་བཞིན་འདུག་པས་ཁོ་རང་ཚོའི་རེ་བ་ལྟར་ལྟ་བཞིན་ཡོད་ཅེས་དང་། སྨན་སྤྲད་སྟངས་སྐོར་ནས་རི་ཁྲོད་ལ་བཞུགས་མཁན་རྣམས་ལ་ཟླ་བ་ལྔ། ཐག་རིང་བོད་སྨན་རག་དཀའ་བ་རྣམས་ལ་ཟླ་བ་གསུམ། སྨན་རྩིས་ཁང་གི་ཉེ་སར་ཡོད་མཁན་རྣམས་ལ་ཟླ་བ་གཅིག་དང་གཉིས་བར་སྤྲོད་ཀྱི་ཡོད་སྐད་གསུངས་བྱུང་།
བཅོས་ཐབས་ནི། རྩ་བལྟ་རྒྱུ། ཁབ་རྒྱག་རྒྱུ། འཕུར་མཉེད། ཁ་ཟས་དང་སྤྱོད་ལམ་བསླབ་རྒྱུ་སོགས་ཀྱི་སྐོར་ཡིན་ཞེས་བརྗོད།
སྨན་པ་ལགས་ཀྱིིས་ཁོང་གི་སྨན་ནི་ཡུན་རིང་སོང་བའི་སྨན་རྙིང་ལྟ་བུ་མ་ཡིན་པར་བཀའ་བརྒྱུད་སྨོན་ལམ་སྐབས་སུ་སྨན་སྦྱིན་གྱི་ཆེད་དུ་སྤྱི་ཟླ་བཅུ་གཅིག་པ་ནས་གྲ་སྒྲིག་གིས་སྨན་བཟོས་ཏེ་གསར་པ་གསར་རྐྱང་སྤྲོད་ཀྱི་ཡོད་ཅེས་དང་། དཔལ་༸རྒྱལ་དབང་ཀརྨ་པའི་ཐུགས་རྗེ་བྱིན་རླབས། བཀའ་བརྒྱུད་སྨོན་ལམ་ཆེན་མོ་འཚོགས་བཞིན་པའི་དམ་པའི་ཆོས་ཀྱི་བྱིན་རླབས་སོགས་ལ་བརྟེན་ནས་ལོ་ཁ་ཤས་ཚུན་ཆད་འདིར་སླེབས་ཏེ་ནད་པར་སྨན་སྦྱིན་གྱིས་ཁོང་ཚོར་ཕན་ཐོགས་ཧ་ཅང་རྒྱ་ཆེན་པོ་བྱུང་ཞེས་གསུངས།
ཐུབ་བསྟན་སྦྱིན་པ་ནས།
