བཀའ་བརྒྱུད་སྨོན་ལམ་སྐབས་སོ་བཞི་པའི་བསོད་སྙོམས་རྒྱུ་འབུལ་གྱི་མཛད་རིམ།

ཕྱི་ལོ་  ༢༠༡༧  ཟླ་  ༢   ཚེས་  ༡༨   ཉིན་སྔ་དྲོ་དུས་ཚོད་བདུན་དང་ཕྱེད་ཐོག་བསོད་སྙོམས་རྒྱུ་འབུལ་གྱི་མཛད་རིམ་དབུ་ཚུགས་ཤིང་།    སྤྱིར་བསོད་སྙོམས་རྒྱུ་འབུལ་གྱི་མཛད་རིམ་འདི་ལོ་སྔར་རྒྱུན་དང་མི་མཚུངས་པར་བདག་ཅག་གི་སྟོན་པ་གཙོ་འཁོར་གསུམ་གྱིས་དབུས་ཐུབ་པས་བཀའ་བསྒོས་ཤིང་བསྟན་པའི་རྒྱལ་མཚན་འཛིན་པའི་འཕགས་པའི་གནས་བརྟན་ཆེན་པོ་ཡན་ལག་འབྱུང་དང་། མ་ཕམ་པ་དང་། ནགས་ན་གནས་པ་ལ་སོགས་གནས་བརྟན་བཅུ་དྲུག་གི་ཞལ་འབག་དང་ཟ་འོག་ལས་གྲུབ་པའི་ན་བཟའ་གསར་དུ་བཅོས་པ་དེ་བཞིན་མནབས་ནས་གནས་བརྟན་རེ་རེའི་མཇུག་ཏུ་ཞལ་ཏ་བ་རེ་དང་གནས་བརྟན་སོ་སོའི་དགྲ་བཅོམ་གྱི་འཁོར་གྲངས་དང་མཐུན་པ་མཚོན་ཕྱིར་དགྲ་བཅོམ་བརྒྱ་ཕྲག་རེར་དགེ་སློང་རེ་རེའི་གྲངས་ཀྱིས་མཚོན་པར་བྱས་ཏེ་གནས་བརྟན་རང་རང་གི་དགྲ་བཅོམ་གྱི་འཁོར་གྲངས་དང་མཐུན་པའི་བར་དུ་གནས་བརྟན་རེ་སྟེ་ཡོངས་བསྡོམས་དགེ་སློང་ལྔ་བརྒྱ་ཙམ་དང་དགེ་སློང་མ་ལྔ་བཅུ་ལ་ཉེ་བ་རྣམས་རེ་རེ་བཞིན་བསོད་སྙོམས་ལ་ཕེབས་སྐབས་སྤྱོད་ལམ་དུལ་ཞིང་གོམ་སྟབས་བུལ་བ་སྔོན་བདག་ཅག་གི་སྟོན་པ་ཐུགས་རྗེ་ཅན་འཇིག་རྟེན་དུ་འཚོ་ཞིང་གཞེས་པའི་སྐབས་སུ་ཡང་དགེ་སློང་རྣམས་བསོད་སྙོམས་ལ་རྒྱུ་ཚུལ་འདི་ལྟ་བུ་ཞིག་ཡིན་ཤས་ཆེ་སྙམ་པའི་དད་གུས་རང་དབང་མེད་པར་སྐྱེ་ཞིང་། ལུས་ཀྱི་བ་སྤུ་དབང་མེད་དུ་ལྡང་བར་བྱེད།

བསོད་སྙོམས་འབུལ་ཚུལ་ཡང་སྔར་ལྟར་མ་ཡིན་པར་འཕགས་པའི་གནས་བརྟན་རྣམས་སྨོན་ལམ་ཆོས་རའི་ནང་གསར་དུ་བསྐྲུན་པའི་རང་རང་གི་བཞུགས་ཁྲིར་འཁོད་ཟིན་རྗེས་བསྙེན་བཀུར་ཞུ་བའི་དད་ལྡན་གྱི་ཡོན་བདག་ཕོ་མོ་རྣམས་ཀྱང་རེ་རེ་བཞིན་ཚང་ཀ་མེད་པར་ཐམས་ཅད་ལ་བསོད་ནམས་ཀྱི་ཚོགས་གསོག་སླད་བསྙེན་བཀུར་ཞུ་བའི་གོ་སྐབས་ལྡན་ལ་ཡིད་འཕྲོག་པའི་དཔལ་དང་ལྡན་པར་གྱུར། 

འདི་ལོ་བཀའ་བརྒྱུད་སྨོན་ལམ་སྐབས་སོ་བཞི་པའི་དུས་འདིར་འཕགས་པའི་གནས་བརྟན་བཅུ་དྲུག་གི་ཞལ་འབག་དང་ན་བཟའ་གནའ་བོའི་ལོ་རྒྱུས་དང་མཐུན་པར་རྒྱ་ལུགས་སུ་མནབས་ཏེ་བསོད་སྙོམས་ལ་ཕེབས་པ་ནི།   དེ་ཡང་ཐོག་མར་བདག་ཅག་གི་སྟོན་པ་སྐུ་མྱ་ངན་ལས་འདའ་ཁར་གང་གི་ལུང་རྟོགས་ཀྱི་བསྟན་པ་གནས་བརྟན་བཅུ་དྲུག་པོར་བདག་པོ་བསྐྱོན་དགོས་ཚུལ་བཀའ་བསྒོས་པ་ཇི་བཞིན་ད་བར་གནས་བརྟན་རྣམས་ཀྱིས་ཡུལ་སོ་སོར་བཞུགས་ཏེ་བསྟན་དོན་རླབས་པོ་ཆེ་མཛད་མུས་ཡིན།   འཕགས་པའི་གནས་བརྟན་རྣམས་བསྟན་པའི་བདག་པོར་སོང་རབ་བྱུང་སྟོང་ཚོ་བརྒལ་བ་གང་དུ་ཚོགས་པའི་གཞིར་དངོས་སུ་ཕེབས་ཏེ་བསྟན་པའི་བྱ་བ་མཛད་ཚུལ་གསུང་རབ་ཁག་གི་ནང་དངོས་སུ་གསལ་བ་ལྟར།   བདག་ཅག་གི་སྟོན་པ་སྐུ་མྱ་ངན་ལས་འདས་རྗེས་འཕགས་པའི་གནས་བརྟན་རྣམས་བསྟན་པའི་བདག་པོ་འགྲོ་བའི་རྣམ་འདྲེན་ཆེན་པོ་དང་གཉིས་སུ་མ་མཆིས་སྟབས་བོད་ཀྱི་དགོན་སྡེ་ཐམས་ཅད་དུ་གནས་བརྟན་བཅུ་དྲུག་གང་རུང་གི་སྐུ་བརྙན་ཞིག་ངེས་པར་དུ་བཞེངས་སྲོལ་ཡོད།

རྗེ་བདུན་པ་ཆོས་གྲགས་རྒྱ་མཚོའི་སྐུ་དུས་སྒར་ཆེན་སྨོན་ལམ་ཆེན་མོ་ཚོགས་སྐབས་གནས་བརྟན་བཅུ་དྲུག་གི་ན་བཟའ་དང་སྐུ་འབག་མནབས་ཏེ་བསོད་སྙོམས་སུ་ཕེབས་སྲོལ་ཡོད་སྟབས་དེ་ཉིད་ཀྱི་རྣམ་ཐར་རྗེས་སུ་དྲན་པ་དང་། གདུལ་བྱ་མཆོག་དམན་ཡོངས་ཀྱིས་དེ་དག་གི་སྐུ་བརྙན་སླར་ཡང་མཇལ་ནུས་པའི་ཕྱིར་དཔལ་༸རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཆོག་ནས་བསྐྱར་གསོ་མཛད་པ་ཞིག་ཀྱང་ཡིན།  དེ་ལྟའི་རྒྱུན་ཀརྨ་པ་སྐུ་འཕྲེང་བཅུ་པ་བར་ཚུགས།  དེ་རྟིང་ཅུང་ཉམས་ཆག་སོང་ཡང་རྒྱུན་ཙམ་ཞིག་བཞུགས་ཡོད་སྟབས་ ༡༩༥༩  སྟེ་བོད་དུས་མ་ལོག་བར་མུ་མཐུད་གནས་ཡོད་སྟབས་སྒར་ཆེན་གྱི་ལམ་སྲོལ་བསྐྱར་གསོ་དང་མི་ཉམས་གོང་འཕེལ་འབྱུང་ཕྱིར། འདི་ལོའི་སྨོན་ལམ་སྐབས་ཀྱང་སྔ་ལོ་ལས་ཀྱང་དམིགས་བསལ་གྲ་རྒྱས་པར་མཛད་པ་ནི་༸རྒྱལ་དབང་མཆོག་གི་གསང་གསུམ་གྱི་མཛད་པ་ཡར་ངོའི་ཟླ་ལྟར་བླ་ནས་བླར་འཕེལ་བའི་རྟེན་འབྱུང་གི་མཚན་མར་ངེས་སོ། །                                                                                  བསྟན་འཛིན་རྣམ་རྒྱལ་ནས།   20170218AM_Alms Procession and offering to the 16 Arhats

Right-Column-Pics25.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་