ཐུགས་རྗེ་ལེགས་འབུལ་གྱི་བཀའ་སློབ།

ཕྱི་ལོ་ ༢༠༡༧ ཟླ་ ༢ ཚེས་ ༡༩ ཉིན་བཀའ་བརྒྱུད་སྨོན་ལམ་ཐེངས་སོ་བཞི་པའི་ཉིན་མཐའ་མའི་ཕྱི་དྲོར། ༸རྒྱལ་དབང་ཀརྨ་པ་མཆོག་ནས་སྦྱིན་བདག་ཡོན་བསྒོའི་བཀའ་སློབ་ཟབ་མོ་སྩལ་ཞིང་གསོན་བསྔོ་དང་གཤིན་བསྔོ་མཛད་ཟིན་པའི་མཇུག་ཏུ། སླར་ཡང་བཀའ་བརྒྱུད་སྨོན་ལམ་ཆེན་མོ་ཐེངས་སོ་བཞི་པའི་སྦྱིན་པའི་བདག་པོ་རྣམས་དང་། ལས་བྱེད་པ་གཙོས་པའི་འདུས་པ་ཀུན་ལ་ཐུགས་རྗེ་ལེགས་འབུལ་གསུངས་པ་འདི་ལྟར།

ད་རེས་བཀའ་བརྒྱུད་སྨོན་ལམ་ཆེན་མོ་ཐེངས་སོ་བཞི་པའི་སྐབས་འདིར་སྤྱི་ཁྱབ་འགན་འཛིན་བླ་མ་ཆོས་གྲགས་དབུ་བཞུགས་ཐོག་ནས་མཆོག་གི་སྤྲུལ་པའི་སྐུ་རྣམ་པ་དུ་མ་ཞིག་ཡར་མར་ཕེབས་པ་སོགས་མི་དཀྱུས་མ་ལྟར་ཕྱག་ལས་མང་པོ་ཞིག་མཛད་པ་ཡོད་པ་དེ་རྣམས་དང་། དགོན་སྡེ་ཁག་ནས་ཕེབས་པའི་མཁན་པོ་དགེ་བའི་བཤེས་གཉེན་རྣམས་དང་། དེ་བཞིན་སྨོན་ལམ་ལས་བྱེད་ང་ཚོ་ཆེ་ཕྲ་ཆུང་ཀུན་དཀའ་སྡུག་མྱོང་ནའང་ལྷན་དུ་མྱོང་། དེ་བཞིན་བདེ་སྐྱིད་བྱུང་ནའང་མཉམ་དུ་ལོངས་སུ་སྤྱོད་རྒྱུའི་གོ་སྐབས་བཟང་པོ་བྱུང་བས་གོ་སྐབས་དེ་དང་བསྟུན་ནས་ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན།

དེ་བཞིན་དུ་སྨོན་ལམ་གྱི་ཆོས་ར་འདི་ཉིད་ཀྱི་འཁྲིས་ལ་ཡོད་པའི་གཏེར་སྒར་དགོན་པའི་སྐྱབས་རྗེ་ཡོངས་དགེ་མི་འགྱུར་རིན་པོ་ཆེ་དབུས་པའི་ལས་བྱེད་ཆེ་ཕྲ་ཆུང་ཀུན་གྱི་ང་ཚོ་ལ་ཕྱག་རོགས་རྨད་དུ་བྱུང་བ་མཛད་ཡོད་པ་དང་། བཀའ་བརྒྱུད་དགུན་ཆོས་ཆེན་མོའི་སྐབས་ཀྱི་ལས་བྱེད་རྣམས་དང་། དེ་བཞིན་ཐར་རྒྱན་བགྲོ་གླེང་ཚོགས་པས་བཀའ་བརྒྱུད་དགུན་ཆོས་ཆེན་མོ་དང་བཀའ་བརྒྱུད་སྨོན་ལམ་གཉིས་ཀའི་སྐབས་སུ་སྐུ་ངལ་དུ་མ་ཞིག་བསྐྱོན་ཡོད་པས་དེ་དག་རྣམས་ལའང་ཐུགས་རྗེ་ཆེ་ཞུ་རྒྱུ་ཡིན།

མཚུར་ཕུ་བླ་བྲང་གི་ལས་བྱེད་རྣམས་ཀྱང་རྒྱུན་དུ་ལས་ཀ་བྱེད་པའི་སྐབས་དང་། དམིགས་བསལ་མཛད་རིམ་ཆེ་ཁག་གང་གི་སྐབས་སུའང་གང་ཐུབ་ཀྱིས་འབད་པ་དྲག་པོ་བྱས་པས་དེ་དག་རྣམས་ལའང་ཐུགས་རྗེ་ཆེ་ཞུ་རྒྱུ་ཡིན།

ད་རེས་དམིགས་བསལ་དུ་ང་དང་ལྷན་དུ་ཡོད་པའི་བོད་གཞུང་གི་སྐུ་ཚབ་དང་། རྒྱ་གར་དབུས་གཞུང་གི་སྐུ་ཚབ་རྣམ་པ་གཉིས་དང་ཁོང་གཉིས་བརྒྱུད་ནས་ས་གནས་གཞུང་དང་། རྒྱ་གར་དབུས་གཞུང་དང་། བོད་གཞུང་རྣམས་རྟག་ཏུ་མཐུན་སྦྱོར་གནང་བ་ལ་ཐུགས་རྗེ་ཆེ་ཞུ་རེ་རྒྱུ་ཡིན།

དེ་ནས་བཀའ་བརྒྱུད་སྨོན་ལམ་གྱི་ཚོགས་མི་རྣམས་དང་། དེ་བཞིན་བླ་མའི་ཞབས་ཞུ་བ་( Guru Sevaka ) རྣམས་དང་པོ་ཐག་རིང་པོ་ཞིག་ནས་ཕེབས་པ་དང་། འདིར་ཕེབས་པ་ཙམ་མ་ཡིན་པར་སྐུ་ངལ་དུ་མ་ཞིག་བསྐྱོན་ཡོད་པས་དེ་དག་རྣམས་ལའང་ཐུགས་རྗེ་ཆེ་ཞུ་རྒྱུ་ཡིན།

དེ་བཞིན་སུ་ཇཱ་སློབ་གྲྭ་ནས་ཕེབས་པའི་སློབ་མ་རྣམས་དང་། དེ་བཞིན་འབྲུག་ནས་ཕེབས་པའི་སློབ་མ་རྣམས་ཀྱང་འཕྱར་བ་གྲུ་འདེགས་ཀྱི་ཚུལ་དུ་ཕྱག་ལས་ཡང་དག་པ་ཞིག་མཛད་པས་དེ་དག་རྣམས་ལའང་ཐུགས་རྗེ་ཆེ་ཞུ་རྒྱུ་ཡིན།

གནད་ཆེ་ཤོས་ཞིག་ལ་སྨོན་ལམ་ཆེན་མོའི་ཚོགས་མགོན་དུ་སྐྱབས་རྗེ་རྒྱལ་ཚབ་རིན་པོ་ཆེ་ཉིད་སྐུ་གཟུགས་བདེ་མིན་ཡོད་ཀྱང་དངོས་སུ་ཞབས་ཀྱིས་བཅགས་ཤིང་། བྱིན་གྱིས་བརླབས་པ་དེ་ལ་ཐུགས་རྗེ་བཀའ་དྲིན་ལྷ་བླག་ཏུ་ཆེ་ཞུ་རྒྱུ་ཡིན།

དེ་བཞིན་ཟུར་མང་གར་དབང་རིན་པོ་ཆེ་དང་། སྐྱབས་རྗེ་མི་འགྱུར་རིན་པོ་རྣམ་པ་གཉིས་ཀྱང་ཞབས་ཀྱིས་བཅགས། ཉིན་རྟག་པར་ཚོགས་སུ་ཕེབས་ཤིང་། བྱིན་གྱིས་བརླབས་པ་དེ་ལ་ཐུགས་རྗེ་ཆེ་ཞུ་རྒྱུ་ཡིན།

དེ་ནས་འབོ་དཀར་ཆུང་སྲིད་རིན་པོ་ཆེ་ཕེབས་ཡོད་པ་དང་། རིན་པོ་ཆེ་སྐུ་གོང་མ་དེ་བཀའ་བརྒྱུད་སྨོན་ལམ་ཀྱི་སྲོག་ཤིང་ལྟ་བུ་ཞིག་གྱུར་ཡོད། དེ་བཞིན་མཁན་རིན་པོ་ཆེ་བློ་གྲོས་དོན་ཡོད་རྣམ་གཉིས་ལའང་དམིགས་བསལ་ཀྱི་ཐུགས་རྗེ་ཆེ་ཞུ་རྒྱུ་ཡིན།

ཕྱོགས་མཐའ་ཁག་ནས་ཕེབས་པའི་སྤྲུལ་སྐུ་རྣམ་པ་དང་། མཁན་པོ་རྣམ་པ་དང་། དགེ་འདུན་པ་རྣམས་དང་། དེ་བཞིན་ཆོས་བརྒྱུད་གཞན་ནས་ཕེབས་པའི་རབ་ཏུ་བྱུང་བ་ཀུན་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།

དེ་ནས་ད་ལན་སྨོན་ལམ་སྐབས་སོ་བཞི་པར་རྒྱལ་ཁབ་ལྔ་བཅུ་ཙམ་ནས་མང་ཚོགས་དུ་མ་ཕེབས་ཡོད། དེ་ཡང་ཀརྨ་པ་བདུན་པ་ཆོས་གྲགས་རྒྱ་མཚོའི་ཞལ་སྔ་ནས། ཡུལ་དང་སྐད་རིགས་མི་གཅིག་པ། མི་རིགས་རྣམ་པ་སྣ་ཚོགས་པ། བདེ་སྐྱིད་ཡང་ཡང་འཛོམས་པར་ཤོག །ཅེས་གསུངས་པ་དེ་ད་ལྟ་མངོན་དུ་འགྱུར་བ་ལྟ་བུ་ཡིན། དེས་ཀྱང་འཛམ་བུ་གླིང་པ་ཀུན་ལ་འཛམ་གླིང་ཞི་བདེ་ཡོང་བ་དང་། འགྲོ་བ་སེམས་ཅན་ཐམས་ཅད་བདེ་སྐྱིད་ཡོང་བའི་སེམས་འཁུར་གཅིག་པ་ཡོད་པ་མཚོན་བཞིན་ཡོད། དེས་ན་ཕྱི་རྒྱལ་ནས་ཕེབས་པ་དང་། ཧི་མཱ་ལ་ཡ་རྣམས་དང་། བོད་པ་རྣམས་དང་། བོད་ནས་གསར་དུ་ཕེབས་པ་ཀུན་ལ་ཐུགས་རྗེ་ཆེ་ཞུ་རྒྱུ་ཡིན།

དེ་བཞིན་ད་ལྟ་རྒྱ་གར་གྱི་ལས་བྱེད་དུ་མ་ཞིག་ཡོད་པ་དེ་རྣམས་དང་། ཉེན་རྟོག་པ་རྣམས་ལའང་ཐུགས་རྗེ་ཆེ་ཞུ་རྒྱུ་ཡིན། གཞན་ཡང་ལྷག་པ་དང་ཆད་པ་དུ་མ་ཞིག་ཀྱང་ཡོད་སྲིད་པས་གང་ལྟར་ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་སྩལ་ཏོ།

དེ་ནས་དབུ་མཛད་ཆེན་མོས་རྗེ་མི་ལའི་སྨོན་ལམ་དང་སྒར་ཆེན་བཀྲ་ཤིས་ལ་སོགས་པའི་འདོན་པ་རྣམས་རབ་ཏུ་སྙན་པའི་དབྱངས་དང་བཅས་དབུ་འཛུགས་གནང་བ་དང་ལྷན་འདུས་པ་ཀུན་གྱིས་དགའ་དད་སྤྲོ་གསུམ་གྱི་སྒོ་ནས་ལེགས་པར་འདོན་པར་མཛད་དེ་མཐར་བཀའ་བརྒྱུད་སྨོན་ལམ་ཆེན་མོ་ཐེངས་སོ་བཞི་པ་དེ་ཉིད་བཀྲ་ཤིས་པའི་སྒོ་ནས་རེ་ཞིག་མཇུག་ལེགས་པར་གྲུབ་བོ། །

སརྦ་མངྒ་ལཾ། །

ཙུམ་ཕྲུག་གངས་ལ་ཉི་ཤར།

Right-Column-Pics33.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་