དགུ་གཏོར་འཆམ་གྱི་སྐོར།

དགུ་གཏོར་གྱི་འཆམ་དེ་བཞིན་ཉིན་གཉིས་རིང་ཡོད་པ་ལས། ཉིན་དང་པོ། བོད་ཚེས་ ༢༨ ཉིན་དང་པོར་འབག་དང་འཆམ་གོས་མེད་པའི་སྒོ་ནས་སྐྱ་འཆམ་འཁྲབ་སྟོན་མཛད་པ་དང་། དེ་ཡང་གོས་སྣུམ་པོ་མ་ཡིན་པར་སྐྱ་བོ་མནབས་ཏེ་འཆམ་བསྐྱོན་པས་ན་སྐྱ་འཆམ་ཞེས་བརྗོད། དུས་རྒྱུན་ལྟར་ན་གོས་འཆམ་དང་འབག་འཆམ་གཉིས་འཆམ་གཅིག་མཚུངས་ཡིན། འོན་ཀྱང་ད་ལན་ཚེས་ ༢༨ དང་ ༢༩ གཉིས་ཀར་གར་འཆམ་མཛད་རྒྱུའི་འཆམ་གཉིས་ཕན་ཚུན་ཐ་དད་ཡིན།  

སྐྱ་འཆམ་གཟིགས་ཞིབ་ཕྱིར་དབུ་བཞུགས་སུ་ཐོག་མའི་ཆར་དཔལ་༸རྒྱལ་དབང་ཀརྨ་པ་མཆོག་གི་དབུས། སྐྱབས་རྗེ་རྒྱལ་ཚབ་རིན་པོ་ཆེ་དང་། མི་འགྱུར་རིན་པོ་ཆེ། འབོ་དཀར་ཆུང་སྲིད་རིན་པོ་ཆེ། མཁན་པོ་བློ་གྲོས་དོན་ཡོད་རིན་པོ་ཆེ། འཇའ་ཚོན་རིན་པོ་ཆེ་སོགས་བླ་སྤྲུལ་རྣམས་དང་། བཤད་གྲྭ་ཁག་གི་མཁན་སློབ་རྣམ་པ།  དེ་བཞིན་གྲྭ་ཚང་ཁག་གི་དབུ་ཆོས་རྣམ་པ། དགེ་བཙུན་འདུས་པ་རྒྱ་མཚོ། འཛམ་གླིང་ཤར་ནུབ་ཀྱི་རྒྱལ་ཁབ་ཁག་ནས་ཕེབས་པའི་དད་ལྡན་སྟོང་ཚོ་དུ་མ་བཅས་ཡོངས་བསྡོམས་ཁྲི་ལ་ཉེ་བར་འདུས།

ཚེས་ ༢༨ ཉིན་གྱི་སྐྱ་འཆམ་དུ་མཱ་ར་ཡ་དང་། བདུན་བརྒྱད་མ་གཉིས་ཀྱི་གར་འཆམ་མཛད་རྒྱུའི་གཏན་འབེབས་མཛད་པ་ལྟར་ཐོག་མར་མི་རིགས་ཀྱི་དགེ་འདུན་པ་ཉི་ཤུ་ཙམ་ནས་མཱ་ར་ཡའི་གར་འཆམ་དུས་ཡུན་ཆུ་ཚོད་གཉིས་ཙམ་རིང་མཛད། དེ་རྟིང་༸རྒྱལ་དབང་མཆོག་ནས་བདུན་བརྒྱད་མའི་འཆམ་དཔོན་མཛད་ཅིང་། མགོན་པོ་མཆོག་གི་དབུས་སྒྲུབ་དཔོན་བདེ་ཆེན་རིན་པོ་ཆེ་དང་རྡོ་རྗེ་སློབ་དཔོན་དང་། དེ་བཞིན་གདན་ས་རུམ་བཏེག་གི་ཆོག་གྲྭ་བཅོ་ལྔ་ཙམ་ནས་བདུན་བརྒྱད་མའི་གར་འཆམ་ཆུ་ཚོད་ཕྱེད་ཙམ་རིང་བསྐྱོན་པར་མཛད།

ཉིན་གཉིས་པ། ཚེས་ ༢༩ ཉིན་གྱི་དགུ་གཏོར་ཆེན་མོ་འདིའི་སྐབས་སུ་འཆམ་སྣ་མི་འདྲ་བ་གསུམ་ཡོད། དེ་ཡང་འཆམ་སྣ་དང་པོ་དེའི་མིང་ལ་སྒོ་མ་ཟེར། སྒོ་མ་བཞི་སྟེ་ལྕགས་ཀྱུ་མ། ཞགས་པ་མ། ལྕགས་སྒྲོག་མ། དྲིལ་བུ་མ་སྟེ་བཞི་ཡིན། འཆམ་འདིའི་བྱེད་ལས་གཙོ་བོ་ནི། དགྲ་བོའི་རྣམ་ཤེས་དགུག་བཅིང་སྡོམ་གསུམ་བྱེད་རྒྱུ་དང་། དེ་བཞིན་ཞུམ་པ་དང་མྱོས་པ་ལ་སོགས་པ་བྱ་རྒྱུ་འདི་ཡིན། སྐབས་འདིར་དགྲ་བོ་ཞེས་པ་འདི་དགྲ་མཚན་ཉིད་པའམ་གང་ཟག་མཚན་ཉིད་པ་ཞིག་ལ་མི་སེམས་པར། གཙོ་བོ་འདི་རང་རྒྱུད་ལ་མཆིས་པའི་བདག་འཛིན་གྱི་དགྲ་བོའམ་བདག་འཛིན་འདི་དགྲ་བོའི་རྣམ་པར་བཀུག་ནས་དེ་དག་སྒྲོལ་བར་བྱ་རྒྱུ་དེ་ལྟར་ཡིན་པས་སྔགས་པ་ནུས་པ་དང་ལྡན་པ་ཞིག་ཡིན་ན་བདག་འཛིན་གྱི་དགྲ་བོ་བཀུག་ནས་དེ་དག་བསྒྲལ་ཚེ་ཕ་རོལ་པོ་དེས་བདག་མེད་རྟོགས་ནས་སྐད་ཅིག་དེ་ཉིད་དུ་གྲོལ་བ་ཡོང་བཞིན་ཡོད། སྔགས་པའི་ཕུར་རྩེ་ལས་སངས་རྒྱས་ཞེས་པ་དེ་འབྱུང་བ་ཡིན།

 དེ་བཞིན་གདན་ས་རུམ་བཏེག་གི་རྡོ་རྗེ་སློབ་དཔོན་རྒྱལ་མཚན་བསོད་ནམས་ནས་འཆམ་དཔོན་མཛད་དེ་ཕྱག་མཚན་དུ་མདའ་གཞུ་སོགས་སྒོ་མ་རེ་རེའི་ཕྱག་མཚན་རྣམས་རིམ་གྱིས་ཐོགས་ཏེ་ལིངྒ་བསྒྲལ་ལས་སོགས་མངོན་སྤྱོད་ཀྱི་གར་འཆམ་མཛད། དེ་མཇུག་རུམ་བཏེག་དང་དཔལ་ཆེན་ཆོས་གླིང་གི་དགེ་འདུན་ཉི་ཤུ་ཙམ་ནས་ཤྭ་འབྲོང་ཟུང་རེ་སྟེ་བཞི་དང་། བདུད་བཙན་བཞི་དང་། དེ་བཞིན་ཀེང་རུས་བཞིས་ཕྱག་མཚན་དུ་ལྕགས་ཀྱུ་ཞགས་པ་དྲིལ་བུ་ལྕགས་སྒྲོག་བཞི་ཐོགས་ཏེ་གར་འཆམ་མཛད།

དེ་བཞིན་སྒོ་མའི་འཆམ་འཁྲབ་དགོས་པའི་རྒྱུ་མཚན་ཡང་། སྒོ་མའི་འཆམ་འདི་ཡི་ནང་དམིགས་བསལ་སྔར་རྒྱུན་དང་མི་འདྲ་བའི་འཆམ་འགའ་ཁ་སྐོང་གི་ཚུལ་དུ་ཡོད། འཆམ་ལྷག་མ་དེ་དག་ཉམས་པ་སླར་གསོའི་ཚུལ་དུ་སྒོ་མ་འཁྲབ་བཅུག་པ་དེ་ལྟར་དང་། རྒྱུན་གཏན་བོད་མཚུར་ཕུ་དགོན་དུ་ཞྭ་ནག་རྔ་འཆམ་སྐབས་ཞིང་སྐྱོང་འཁྲབ་རྒྱུ་དང་། སྒོ་མ་འཁྲབ་རྒྱུ་དེ་དག་མེད་མོད། དེ་རིང་དམིགས་བསལ་བྱས་ཏེ་དང་པོ་སྒོ་མའི་གར་འཆམ་མཛད་པ་དེ་ལྟར་ཡིན།

དེ་རྗེས་ལ་འཆམ་སྣ་གཉིས་པ་འདི་ཞྭ་ནག་རྔ་འཆམ་ཡིན། ཞྭ་ནག་རྔ་འཆམ་ཞེས་པའི་མཚན་དེ་དག་ཐོགས་་དོན་གང་ཡིན་ཞེ་ན། མགོ་ལ་ཞྭ་ནག་གྱོན་ཅིང་ལག་ཏུ་རྔ་འཁྱེར་ནས་འཆམ་འཁྲབ་ཀྱི་ཡོད་སྟབས་ཞྭ་ནག་རྔ་འཆམ་ཞེས་བཏགས། འཆམ་འདི་རྗེ་ཀརྨ་པ་དྲུག་པ་མཐོང་བ་དོན་ལྡན་གྱིས་དགུང་ལོ་བདུན་བརྒྱད་ཀྱི་སྐབས་སུ་མགོན་པོ་ཞལ་གཟིགས་བྱུང་ནས་མཛད་པ་ཞིག་ཡིན། དེས་ན་ཀཾ་ཚང་གི་ཐུན་མོང་མ་ཡིན་པའི་འཆམ་ཞིག་ཏུ་གྱུར་ཡོད། སྤྱིར་རང་རེས་འཆམ་འདི་ལེགས་པར་མཇལ་སྐབས་མཚམས་རེ་བྱིས་པའི་རྣམ་འགྱུར་ལྟ་བུ་ཅུང་ཙམ་ཡོང་བཞིན་ཡོད། དེ་ཇི་ལྟར་ཡིན་ཞེ་ན། ཁོང་དགུང་ན་ཕྲ་བའི་དུས་སུ་མཛད་པའི་མཚན་མར་ངེས་སྙམ། དེའི་མཇུག་ཏུ་ཀརྨ་པ་དྲུག་པའི་ཡང་སྲིད་རྗེ་བདུན་པ་ཆོས་གྲགས་རྒྱ་མཚོ་ཁོང་གིས་སྐུ་ན་ཆུང་དུས་ཁོང་དྲུག་པ་མཐོང་བ་དོན་ལྡན་གྱི་ཡང་སྲིད་ཡིན་པས་ཁོང་གིས་ཞྭ་ནག་རྔ་འཆམ་དེ་ལྟར་འཁྲབ་དགོས་ཞེས་གསུངས་ནས་ཆུང་དུས་སྐབས་ཞྭ་ནག་རྔ་འཆམ་དེ་དག་འཁྲབ་པར་མཛད། རྗེ་བདུན་པ་ཆོས་གྲགས་རྒྱ་མཚོའི་སྐབས་ཞྭ་ནག་རྔ་འཆམ་ལ་འགྱུར་བ་ཕྲན་བུ་ཞིག་བཏང་བར་མཛད་སྙམ། དེ་ཡང་དེ་རིང་གི་འཆམ་གཙོ་བོ་དེ་ཞྭ་ནག་རྔ་འཆམ་ཡིན།  

རྒྱ་གར་འཕགས་པའི་ཡུལ་དུ་ཀརྨ་པ་དྲུག་པ་མཐོང་བ་དོན་ལྡན་གྱིས་མཛད་པའི་མགོན་པོའི་ལས་བྱང་ཆེན་པོ་དང་། མགོན་པོའི་རྔ་འཆམ་ཆེན་པོ་དེ་གཉིས་སྟབས་ཅིག་ཏུ་འཁྲབ་རྒྱུ་འདི་རྒྱ་གར་འཕགས་པའི་ཡུལ་དུ་ཐེངས་དང་པོར་གྱུར་ཡོད། དེ་བཞིན་བོད་གངས་ཅན་ལྗོངས་སུ་ཡང་ཕལ་ཆེར་ལོ་ངོ་ཉིས་བརྒྱ་སུམ་བརྒྱའི་ནང་ལ་ཕལ་ཆེར་བྱུང་མེད་ཅེས་བརྗོད་ནའང་འཐུས་སྙམ། དེའི་སྟེང་དུ་ཞྭ་ནག་རྔ་འཆམ་གྱི་མཐའ་མར་འཆམ་མུ་མཐུད་ནས་གཏོར་མ་འཕེན་རྒྱུ་དང་ཟོར་འཕེན་རྒྱུའི་འཆམ་ཞིག་ཡོད། དེ་ཀརྨ་པ་རང་བྱུང་རྡོ་རྗེས་རྙིང་ལུགས་ཀྱི་མ་མོའི་རྒྱུད་ལ་བརྟེན་ནས་མཛད་པ་ཞིག་ཡིན།  

འདི་ལོ་ཚེས་ ༢༩ ཉིན་གྱི་ཞྭ་ནག་རྔ་འཆམས་དེ་བཞིན་བན་ཆེན་དགོན་གྱི་མཁན་པོ་ནས་འཆམ་དཔོན་མཛད་དེ་དགེ་འདུན་པ་ཉི་ཤུ་ཙམ་ནས་དུས་ཡུན་ཆུ་ཚོད་ལྔ་ཙམ་རིང་ངལ་བ་མེད་པར་གར་འཆམ་མཛད།

འཆམ་སྣ་གསུམ་པ་དེ་ཞིང་སྐྱོང་གི་འཆམ་ཡིན། ཞིང་སྐྱོང་འདི་ཀརྨ་པའི་ཆོས་སྐྱོང་འཁོར་ལྔའི་ནང་ཚན་ཞིག་ཏུ་གྱུར་ཡོད་ལ། དེ་བཞིན་ཙཱ་རི་ཏྲ་ཡེ་ཤེས་ཀྱི་འཁོར་ལོ་ཞེས་ཙཱ་རིའི་གནས་ཀྱི་སྲུང་མ་ཡིན་པའི་ཆ་ནས་ཕལ་ཆེར་ཞིང་སྐྱོང་ཞེས་པ་ཞིག་ཡོང་བཞིན་ཡོད་སྙམ། ཁོང་ནི་སེང་གེའི་གདོང་པ་ཅན་ཞིག་ཡིན་པ་དང་། བླ་མ་འགའ་ཞིག་གི་གསུང་རྒྱུན་ལ། ཆོས་སྐྱོང་ཕྱག་བཞི་པའི་འཁོར་དུ་སེང་གེའི་གདོང་པ་ཞིག་ཡོང་བས་དེ་དང་གཅིག་མཚུངས་ཡིན་པར་གསུངས། མདོར་ན་དཔལ་འཁོར་ལོ་སྡོམ་པ་དང་ཆོས་སྐྱོང་ཕྱག་བཞི་པའི་རྣམ་པར་འཕྲུལ་པ་དེ་འདྲ་ཞིག་གསུངས་ཡོད། ཞིང་སྐྱོང་དེ་ནི་ཆོས་སྐྱོང་གཞན་ལས་དམིགས་བསལ་གྱི་མཐུ་རྩལ་ཆེ་བ་དང་དངོས་གྲུབ་མྱུར་བ་ཡིན་ཞེས་གསུངས་ཡོད།

ཞིང་སྐྱོང་འདི་ཀརྨ་ཀཾ་ཚང་གི་སྲུང་མར་གྱུར་པ་འདི་དང་པོ་ཀརྨ་པ་སྐུ་ཕྲེང་གཉིས་པ་ཀརྨ་པཀྵིའི་སྐབས་ནས་བྱུང་བ་ཞིག་ཏུ་གྱུར་ཡོད། དེ་བཞིན་ཞྭ་དམར་སྐུ་ཕྲེང་གཉིས་པ་ཞྭ་དམར་མཁའ་སྤྱོད་དབང་པོ་ནས་བཟུང་སྟེ་ཞྭ་དམར་སྐུ་ཕྲེང་རིམ་བྱོན་གྱི་ཐུན་མོང་མ་ཡིན་པའི་སྲུང་མར་གྱུར་ཡོད། འདི་སྐབས་ཀྱི་གར་འཆམས་མཛད་པོ་ཡང་བལ་ཡུལ་བན་ཆེན་དགོན་གྱི་དགེ་འདུན་པ་ཉི་ཤུ་ཙམ་ནས་འཁྲབ་སྟོན་མཛད།

དེ་རིང་འདིར་ཞིང་སྐྱོང་གི་འཆམ་འཁྲབ་དགོས་པའི་རྒྱུ་མཚན་ནི། གཙོ་བོ་འཆམ་འཁྲབ་སྟོན་མཛད་མི་བན་ཆེན་དགོན་གྱི་དགེ་འདུན་པ་རྣམས་ནས་འཁྲབ་ཀྱི་ཡོད། ཞིང་སྐྱོང་འདི་བན་ཆེན་དགོན་པའི་ཐུན་མོང་མ་ཡིན་པའི་སྲུང་མ་རྩ་ཆེན་ཞིག་ཏུ་བརྩི་བར་མཛད་བཞིན་ཡོད། དེས་ན་གཙོ་བོར་སྐྱབས་རྗེ་བསྟན་དགའ་རིན་པོ་ཆེའི་ཡང་སྲིད་འཁྲུལ་བྲལ་མགྱོགས་མྱུར་ཕེབས་ཐུབ་དང་། དེ་ལ་བར་ཆད་ཀྱི་མཚན་མ་ཅི་མཆིས་པ་ཐམས་ཅད་ཉེ་བར་ཞི་བའི་སླད་དུ་ཞིང་སྐྱོང་གི་འཆམ་འཁྲབ་དགོས་ཀྱི་ཡོད་ཅེས་༸རྒྱལ་དབང་མཆོག་ནས་ཁོང་རྣམ་པར་བཀའ་སྩལ་པ་ལྟར་འཁྲབ་སྟོན་མཛད་པ་ཞིག་ཡིན།  བསྟན་འཛིན་རྣམ་རྒྱལ་ནས།

20170224PM_Cham Dance without Costumes

Right-Column-Pics3.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་