ངེས་དོན་སྒྲོན་མེ་ལས་བླ་མའི་རྣལ་འབྱོར་གྱི་གསུང་ཆོས་ཐུན་དང་པོ།

ཕྱི་ལོ་ ༢༠༡༧ ཟླ་བ་ ༢ ཚེས་ ༩ ཉིན་སྔ་དྲོའི་ཆོས་ཐུན་དུ། དཔལ་༧རྒྱལ་དབང་ཀརྨ་པ་མཆོག་ནས་དེ་རིང་བཀའ་བརྒྱུད་སྨོན་ལམ་ཆེན་མོ་ཐེངས་སོ་བཞི་པའི་སྔོན་འགྲོའི་གསུང་ཆོས་བཤད་པའི་དུས་ལ་བབ་ཡོད། ཁ་རྩང་གོང་དུ་ཞུས་པ་བཞིན་ཕྱག་ཆེན་ངེས་དོན་སྒྲོན་མེ་ལས་བླ་མའི་རྣལ་འབྱོར་གྱི་ཁྲིད་བྱ་རྒྱུ་ཡིན། ད་ལོ་མཐའ་མར་གྱུར་ཡོད། ཐུན་བཞི་བླ་མའི་རྣལ་འབྱོར་དེ་སྐད་ཡིག་བཅུ་ཡི་ནང་བསྒྱུར་ཡོད། ཐུན་བཞི་བླ་མའི་རྣལ་འབྱོར་གྱི་ཡིག་ཆ་ཕྱོགས་སྒྲིག་ཀྱང་བྱས་ཡོད། འགའ་ཤས་དེབ་ནང་སྤར་ཡོད་ལ་(website)(ཝེབ་སེབ་)ནང་འཕྲུལ་དེབ་བཟོས་ནས་བཞག་ཡོད། དེའི་དྲ་ཚིག་དེ་ཁྱེད་ཚོ་ཚང་མར་ཁྱབ་བསྒྲགས་བྱ་རྒྱུ་ཡིན། དྲ་ཚིག་གསར་པ་དམ་ཆོས་འཕྲུལ་དེབ་(Dharma eBooks)ཟེར་བའི་དྲ་ཚིགས་ཤིག་ཡོད། དེའི་ནང་བོད་ཀྱི་བཀའ་བསྟན་འགྱུར་གཙོ་བོར་བྱས་པའི་གཞུང་ལུགས་དུ་མ་ཡོད། དེ་ཡང་བོད་སྐད་གཅིག་པུ་མ་ཡིན་པར་དབྱིན་ཡིག་དང་རྒྱ་ཡིག་སོགས་ཡིག་རིགས་མང་པོའི་ཐོག་ཏུ་ཡོད་པས་ཁྱེད་ཚོར་ཐུགས་ཕན་སོས་པའི་རེ་བ་ཡོད། འཁོར་ལོ་བདེ་མཆོག་གི་དབང་ཐོབ་ཚད་ལ་ཐུན་བཞི་བླ་མའི་རྣལ་འབྱོར་མ་ཆད་པར་ཉམས་ལེན་བྱ་དགོས་པ་རེད་ཅེས་ཁྱབ་བསྒྲགས་བྱས་ཡོད། མི་མང་པོ་ཞིག་གིས་དེ་ཉམས་ལེན་རྒྱུན་མ་ཆད་པར་བྱ་ཐུབ་མིན་ལ་དོ་སྣང་བགྱིད་མཁན་མང་པོ་འདུག་པས་ཧ་ཅང་ཡག་པོ་རེད། སྤྱིར་བཏང་ཡི་དམ་ལྷ་ཡི་དབང་ཞུས་ན་བླ་མའི་རྣལ་འབྱོར་གྱི་བསྙེན་སྒྲུབ་ཉམས་ལེན་བྱེད་དགོས་ཀྱང་། ཡི་དམ་ལྷ་ཡི་དབང་ཞུ་རྒྱུ་མང་དུས་ཚང་མ་ཉམས་ལེན་བྱ་ཐུབ་རྒྱུ་ཁག་པོ་རེད། ཡིན་ནའང་ཅི་ཐུབ་ཐུབ་ཅིག་བླ་མའི་རྣལ་འབྱོར་ལ་བརྩོན་དགོས། ལྷག་པར་དུ་ཀཾ་ཚང་ལྟ་བུ་ལ་བླ་མའི་རྣལ་འབྱོར་ཤིན་ཏུ་གལ་ཆེ། ད་རེས་ཀཾ་ཚང་གཅིག་པུ་མ་ཡིན་པར་མི་མང་པོ་ཕེབས་ཡོད་པས་དེ་དག་ཐམས་ཅད་ཀྱིས་སོ་སོའི་བླ་མའི་རྣལ་འབྱོར་ལ་བརྩོན་དགོས་པ་དེ་གལ་ཆེན་པོ་རེད། གཙོ་བོ་དེ་དབང་ཐོབ་པ་ཙམ་གྱིས་མི་འགྲིག་པར་སོ་སོས་ཉམས་སུ་ལེན་ཆོག་བྱས་ཏེ་དབང་བསྐུར་ཡོད་པ་ཡིན་དུས་འཇོན་ནུས་གང་ཡོད་ལ་བསྟུན་ནས་ཉམས་སུ་ལེན་པར་བྱ་དགོས། ཐུན་བཞི་བླ་མའི་རྣལ་འབྱོར་ཇི་ཙམ་ཡོད་དམ་ཅི་འདྲ་ཡོད་དམ་སྙམ་ནས་དྲི་བ་སླེབ་ཀྱི་རེད། ལྷག་པར་དུ་ཕྱི་རྒྱལ་ལ་སྡོད་མཁན་ཚོར་ཕྱག་ལས་མང་པོ་ཡོད་པས་དེའི་ཐོག་ཏུ་བླ་མའི་རྣལ་འབྱོར་མ་ཆད་པ་བྱ་དགོས་རེད་བརྗོད་དུས་འགན་ཆེན་པོ་འགེལ་བ་ལྟ་བུ་ཚོར་སྲིད། མ་གཞི་ཐུན་བཞི་བསྡུས་པ་ཞིག་ཡོད་དེ། དེ་ཉིད་ཀུན་ལ་སློབ་ཚེ་ཚང་མས་དེ་ཉམས་ལེན་བྱས་ཏེ་རྒྱས་པ་དེ་བཞིན་ལྷག་ཉེན་ཆེ་བས་བསླབ་རྒྱུ་མིན། ཁྱེད་རང་ཚོར་ལྷག་པའི་ལྷའི་སྒོམ་བཟླས་མང་པོ་ཡོད་ཚེ་འགའ་ཤས་བསྡུས་ཆོག་པས་སྒོ་གཅིག་ལ་ཞེན་དགོས་པ་དེ་འདྲ་མེད། ད་ངེས་དོན་སྒྲོན་མེ་ནང་གི་བླ་མའི་རྣལ་འབྱོར་ནང་འགྲོ་རྒྱུ་ཡིན་པས་དང་པོ་ལེན་གཅིག་འདོན་ཏེ་བཤད་རྒྱུ་ཡིན། ང་ཚོས་རྒྱུན་དུ་ཐུན་མོང་མ་ཡིན་པའི་ཐུན་བཞི་ཉམས་སུ་ལེན་པའི་སྐབས་སུ་རང་ཉིད་ཐ་མལ་པ་མ་ཡིན་པར་ཡི་དམ་གང་རུང་ཞིག་སྒོམ་དགོས། ཡི་དམ་བསྒོམ་དགོས་རྒྱུ་དེ་ཐ་མལ་པའི་སྣང་བ་དེ་བཙན་ཐབས་སུ་བཀག་ནས་བརྩོན་ཚེ་དམ་པའི་སྣང་བ་འབྱུང་སླ་བ་ཡིན། དེའི་གནད་དེ་གང་རེད་ཅེ་ན་ཁྱེད་རང་ཚོས་ཤེས་རྒྱུ་རེད། ནམ་རྒྱུན་ང་རང་ཚོ་ཐ་མལ་པར་འཛིན་ཏེ་བསྡད་པ་ཡིན་ན་དམིགས་བསལ་གྱི་སེམས་ལ་ཚོར་བ་སྐྱེ་རྒྱུ་དང་སྤོབས་པ་སྐྱེ་རྒྱུ་ཅི་ཡང་མེད། དེས་ན་ང་ཚོས་ཡི་དམ་གྱི་སྒོམ་བྱེད་དུས་གང་བྱ་དགོས་ཞེ་ན་རང་ཉིད་ཡི་དམ་གྱི་ལྷ་སྤྱན་རས་གཟིགས་བསྒོམ་ན་རང་ཉིད་སྤྱན་རས་གཟིགས་དང་གཉིས་སུ་མེད་པར་སེམས་དགོས། དེ་ཡིན་བསམས་དུས་ནམ་རྒྱུན་གཏན་ལྟར་བྱས་ན་མི་འགྲིག སྤྱན་རས་གཟིགས་ཀྱི་མཛད་པ་དང་མཚུངས་པར་བྱ་དགོས། ་་ རང་ཉིད་སྤྱན་རས་གཟིགས་ཡིན་སྙམ་དུས་གཞན་གྱིས་ཅི་བྱས་ཀྱང་ཁོང་ཁྲོ་ལངས་མི་ཉན། མཚམས་རེར་གློག་བརྙན་བལྟ་དུས་གློག་བརྙན་ནང་གི་མིའི་བྱ་ཚུལ་བཞིན་ལད་མོ་བྱེད་ཀྱི་ཡོད་པ་ལྟར་སོ་སོ་མོས་པ་ཡོད་པའི་ལྷ་དེའི་བྱ་བ་བཞིན་བྱེད་དགོས་པ་རེད། དཔེར་ན། གློག་བརྙན་ནང་གི་མི་དེས་བྱེད་སྟངས་ཇི་བཞིན་བྱེད་དགོས། གཞན་ལ་མོས་པ་བྱེད་པ་དེ་ཕྱོགས་གཅིག་ནས་འདྲ་སྟེ་ཕྱོགས་གཞན་ནས་མི་འདྲ། ང་ཚོ་ཡི་དམ་གྱི་ལྷ་མ་ཡིན་བཞིན་དུ་ཡིན་བསམ་པ་དེ་འདྲ་མ་རེད། སོ་སོ་ལ་སངས་རྒྱས་བྱེད་ཀྱི་བདེ་གཤེགས་སྙིང་པོ་ཡོད་པས། བདེ་གཤེགས་སྙིང་པོ་དེ་དབུ་མ་ཐལ་འགྱུར་པའི་ལུགས་ལ་སྟོང་ཉིད་ཀྱི་རང་བཞིན་དུ་གྱུར། དབུ་མ་གཞན་སྟོང་ལྟར་ན་སྟོང་པ་ཉིད་མེད་དགག་ཙམ་ལ་ངོས་འཛིན་གྱི་མེད། དབུ་མ་པས་ཆོས་ཐམས་ཅད་སྟོང་པ་ཉིད་དུ་བསྟན་པ་ལས་ཆོས་ཉིད་འདི་རེད་ཅེས་མཛུབ་ཚུགས་བྱས་མེད། བདེ་གཤེགས་སྙིང་པོའི་ལུགས་ཀྱི་ཆོས་ཉིད་འདི་རེད་ཅེས་མཛུབ་མོ་བཙུགས་ནས་བསྟན་ཡོད། དེ་འདྲ་བའི་ཡེ་ཤེས་ཟེར་ནའང་འདྲ། སྙིང་པོ་དེ་ས་ལ་བཞུགས་པའི་འཕགས་པ་ཡིན་ན་འདྲ་ང་ཚོའི་རྒྱུད་ཀྱི་སྙིང་པོ་དེ་ལ་ཁྱད་པར་མེད། རྣམ་པའི་ཆ་ནས་དྲི་མས་བསྒྲིབས་མ་བསྒྲིབས་ཙམ་ལས་ངོ་བོའམ་རང་བཞིན་དེ་གཅིག་པ་ཡིན། དཔེར་ན་ས་རྡོས་གོས་པའི་གསེར་དེ་བཙོ་སྦྱངས་བྱས་མ་བྱས་ཙམ་ལས་ཁྱད་པར་ཡོད་མ་ཡིན། བཙོ་སྦྱངས་ཟིན་དུས་གསེར་གྱི་ངོ་བོ་མངོན་ཡོང་བ་ཇི་བཞིན་རེད། རང་རེ་ཀུན་ལ་དག་པ་གཉིས་ལྡན་གྱི་ཆོས་སྐུ་སྒྲུབ་བྱེད་ཀྱི་ཆ་རྐྱེན་མ་ལུས་ཚང་ཡོད་པས་མོས་པ་བྱས་པ་ཙམ་མ་ཡིན། དེ་ཡི་དམ་སྒོམ་དགོས་པའི་རྒྱུ་མཚན་གང་དྲན་བཤད་ཟིན་པ་ཡིན། དེའི་མཇུག་ཏུ་ཡི་དམ་དུ་མ་ཡོད་པ་ལས་གང་ཞིག་བསྒོམ་དགོས་ཞེ་ན། དཔེར་ན། འདིར་ཡི་དམ་གྱི་ཐང་ཀ་མང་པོ་བཤམས་ཡོད། དེ་དག་ཁྱེད་ཚོར་ངོས་འཛིན་གྱིས་ཟེར་ན་ངོས་ཟིན་ཁག་པོ་ཡོད། དེ་རིང་འདིར་སོ་སོའི་མཚན་སྦྱར་ཡོད། ཐང་ཀ་འདིའི་ལོ་རྒྱུས་བཤད་ན། སི་ཏུ་ཆོས་འབྱུང་གིས་ཞལ་བཀོད་གནང་ནས་བྲིས་པ་རེད། འདི་འགྲེམས་སྟོན་ཁང་ཞིག་ནས་པར་རྒྱག་རྒྱུ་བྱུང་བས་ཐང་ཀ་ཉེར་བདུན་ཡོད། སྔོན་མ་ཡིན་ན་ངས་ཡི་དམ་གྱི་ལྷ་དེ་ཚོ་ངོས་ཟིན་གྱི་ཡོད་དེ་དེང་སང་ངོས་ཟིན་གྱི་མི་འདུག དཔེར་ན་རྡོ་རྗེ་ཕག་མོ་གཅིག་པུ་ལ་མ་འདྲ་བ་ཉི་ཤུ་ལྷག་འདུག་པས་ངོས་ཟིན་ཁག་པོ་འདུག རང་ཉིད་ལ་ཡི་དམ་གྱི་ལྷ་མང་པོ་ཡོད་ན་ཡང་སོ་སོའི་མོས་པ་ཡོད་པའི་ལྷ་དེའི་དབང་ཐོབ་ནས་སྒོམ་ན་འགྲིག་པ་ཡིན། སྐབས་འདིར་ཀརྨ་ཀཾ་ཚང་གི་ལུགས་ལ་རྡོ་རྗེ་རྣམ་འབྱོར་མ་བསྒོམ་དགོས་གསུངས་ཡོད། གང་ཡིན་ཞེ་ན་མར་པ་ལོ་ཙྰ་དང་། མི་ལ་རས་པ། དྭགས་པོ་རིན་པོ་ཆེ་རྣམ་པ་གསུམ་གྱི་གསང་བའི་རྣམ་འབྱོོར་མ་རེད། མར་མི་དྭགས་གསུམ་དེ་བཀའ་བརྒྱུད་པའི་མེས་པོ་ཡིན་དུས་ཁོང་རྣམ་པས་གང་མཛད་པ་དེ་ང་ཚོས་ཨེ་ཐོན་མི་ཐོན་བལྟ་དགོས་པ་རེད། དམིགས་བསལ་དུ་ཕྱག་ཆེན་ཉམས་སུ་ལེན་མཁན་ཚོས་རྣལ་འབྱོར་མ་བསྒོམ་དགོས། དེ་ཡང་རྣལ་འབྱོར་མ་དེ་ཕྱག་རྒྱ་ཆེན་པོ་མཚོན་བྱེད་ཡིན། ཡིན་ན་ཡང་རྡོ་རྗེ་རྣལ་འབྱོར་མ་བསྒོམ་པ་ལ་དབང་ཐོབ་དགོས་ཤིང་། རྡོ་རྗེ་རྣམ་འབྱོར་མ་དེ་བཀའ་རྒྱ་ཆགས་ཡོད། ད་ལན་བདེ་མཆོག་གིས་དབང་ཐོབ་པ་ཡིན་དུས་རྡོ་རྗེ་རྣལ་འབྱོར་མ་ཉམས་ལེན་བྱེད་ཆོག་གི་མེད་དམ་སྙམ། ཀཾ་ཚང་གི་སྔོན་འགྲོ་གཏོང་མཁན་རྣམས་ཡིན་ན་རྣལ་འབྱོར་མ་ཞོག་དགོས་པ་དེ་གལ་ཆེན་པོ་རེད། དེ་མིན་ཡང་སོ་སོའི་ཡི་དམ་གང་རུང་སྔོན་དུ་འགྲོ་དགོས་པ་རེད། ཐུབ་བསྟན་སྦྱིན་པས་ཕབ།

Right-Column-Pics3.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་