དཔལ་འཁོར་ལོ་བདེ་མཆོག་དབང་ཆེན་གྱི་སྟ་གོན།

ཕྱི་ལོ་ ༢༠༡༧ ཟླ་བ་ ༢ ཚེས་ ༧ ཉིན་གུང་ཡོལ་ཆུ་ཚོད་ ༢ པའི་ཐོག་དཔལ་༸རྒྱལ་དབང་ཀརྨ་པ་མཆོག་ནས་༸སྐྱབས་རྗེ་རྒྱལ་ཚབ་རིན་པོ་ཆེ་དང་མི་འགྱུར་རིན་པོ་ཆེས་དབུས་པའི་བླ་སྤྲུལ་རྣམ་པ་དང་དེ་བཞིན་མཁན་སློབ་དགེ་འདུན་འདུས་པ་རྒྱ་མཚོ་དང་། ཕྱི་ནང་རྒྱལ་ཁབ་དུ་མ་ནས་ཕེབས་པའི་དད་ལྡན་ཆོས་ཞུ་བ་ཁྲི་ཚོ་བརྒལ་བར་དབང་གི་སྔོན་འགྲོ་སྟ་གོན་གྱི་དབང་སྩལ། སྟ་གོན་ཞེས་པ་ནི་གྲ་སྒྲིག་གི་དོན་དང་། དེ་ཡང་བླ་མའི་སྐུ་དྲུང་ནས་དབང་ཞུས་ཏེ་དབང་གི་དམ་ཚིག་རྣམས་རང་གིས་ཚུལ་བཞིན་ཁས་ལེན་བྱ་རྒྱུ་ཡིན་ཞེས་པའི་དོན་ཡིན། གཞན་ཡང་དབང་ཞུ་བ་པོ་དེ་ཉིད་བླ་མས་དབང་སྩལ་ཡུལ་གྱི་སྐལ་ལྡན་གྱི་གདུལ་བྱ་ཡིན་མིན་བརྟག་པའི་ཕྱིར་དུ་ཡིན། དེ་ལ་བརྟག་ཐབས་ཀྱི་རྫས་བཞི་ཡོད་དེ། ཁྱོར་ཆུ། སོ་ཤིང་། དཔུང་བཏགས་སྲུང་སྐུད། ཀུ་ཤ་སྟེ་བཞི་ཡིན། དེ་ལས་དང་པོ་ཁྱོར་ཆུ་ནི་དམ་ཚིག་ཁས་བླང་གི་ཕྱིར་བེད་སྤྱོད་པ་ཡིན། རྫས་ལྷག་མ་གསུམ་ནི་བརྟག་པའི་ཕྱིར་བེད་སྤྱོད་པ་ཡིན། དེ་ཡང་བརྟག་ཐབས་མི་འདྲ་བ་གཉིས་སུ་ཡོད་པ་ལས། དང་པོ་ནི་མངོན་སུམ་དུ་བརྟག་པ་དང་། གཉིས་པ་རྨི་ལམ་བརྟག་པ་སྟེ་གཉིས་ཡིན། མངོན་སུམ་གྱི་བརྟག་ཚུལ་ནི་དཀྱིལ་འཁོར་ནང་སོ་ཤིང་བོར་བ་དེ་ཡིན། དཔུང་བཏགས་སྲུང་སྐུད་ནི་རྨི་ལམ་ལ་བར་ཆད་མི་འབྱུང་བའི་ཕྱིར་དང་། རྩྭ་ཀུ་ཤ་ནི་རྨི་ལམ་བཟང་ངན་བརྟག་པའི་སླད་དུ་ཡིན། སྤྱིར་རང་ཉིད་ལ་དབང་ཐོབ་པའི་སྐལ་ལྡན་གྱི་གདུལ་བྱ་ཡིན་མིན་གོང་གི་བརྟག་པ་དེ་དག་གི་སྒོ་ནས་ཚུལ་བཞིན་དཔྱད་དགོས་ཀྱང་། དེང་རྟེན་འབྲེལ་གྱི་ཚུལ་དང་གཙོ་བོར་དད་པ་དང་མོས་པ་བཅོས་མ་མེད་པ་ཞིག་ལྡན་ཚེ་ཀུན་ལ་ཐོབ་པ་ཡིན། དེ་ཡང་༸རྒྱལ་དབང་མཆོག་ནས་བཀའ་སྩལ་གསལ་དུ། ད་ལན་བཀའ་བརྒྱུད་སྨོན་ལམ་ཐེངས་སོ་བཞི་པར་ཡི་དམ་འཁོར་ལོ་བདེ་མཆོག་གི་ཐོག་ནས་དབང་བྱ་རྒྱུ་ཡོད་པ་ལས་དེ་རིང་དབང་གི་སྟ་གོན་དང་། སང་ཉིན་དབང་གི་དངོས་གཞི་བྱ་རྒྱུ་ཡིན། ད་ལན་ཁྲིད་ཡིག་ངེས་དོན་སྒྲོན་མེ་ལས་བླ་མའི་རྣལ་འབྱོར་གྱི་ཁྲིད་བཞག་ཡོད། བླ་མའི་རྣལ་འབྱོར་གྱི་སྐབས་ཡི་དམ་གང་རུང་གི་སྒོ་ནས་རྒྱུད་ལ་སྐྱེ་བར་བྱ་དགོས་པར་བརྟེན་དབང་ཞིག་བྱ་དགོས་ཤིང་། ཐུན་མོང་གི་སྔོན་འགྲོའི་ནང་བླ་མའི་རྣལ་འབྱོར་གྱི་ཁྲིད་ཙམ་མ་ཟད་༸རྒྱལ་དབང་མི་བསྐྱོད་རྡོ་རྗེའི་ཐུན་བཞི་བླ་མའི་རྣལ་འབྱོར་གྱི་ཁྲིད་ཀྱང་མཆིས་པས་དེ་དང་འབྲེལ་བའི་ཕྱིར་བདེ་མཆོག་གི་དབང་དེ་བཞིན་བགྱིད་རྒྱུ་བྱས་པ་ཡིན། དེ་ཡང་རྒྱལ་སྲས་ཆེན་པོ་ཞི་བ་ལྷས། དལ་འབྱོར་འདི་ནི་རྙེད་པར་ཤིན་ཏུ་དཀའ། །སྐྱེས་བུའི་དོན་གྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་དེ་ཡང་དག་འབྱོར་པ་ག་ལ་འགྱུར། །ཞེས་སོགས་ཀྱི་སྐབས་ནས་བསྟན་པ་བཞིན། རང་རེར་ཆོས་སྒྲུབ་པའི་འགལ་རྐྱེན་དང་བྲལ་ཞིང་། མཐུན་རྐྱེན་ཚང་བ་འདི་ལྟ་བུའི་དལ་འབྱོར་གྱི་རྟེན་ཡང་ཡང་སོན་པ་ཤིན་ཏུ་དཀའ་བས། དལ་འབྱོར་ཐོབ་པའི་གནས་སྐབས་སུ་དལ་འབྱོར་དོན་ཡོད་པ་བགྱི་རྒྱུ་ཤིན་ཏུ་གལ་ཆེ་བ་ཡིན། དལ་འབྱོར་དོན་ཡོད་པ་དང་དོན་ཆེ་ལུགས་ཇི་ལྟར་བྱ་ཞེ་ན། སློབ་དཔོན་ཙནྡྲ་གོ་མིས་རང་གི་སློབ་མར་སྤྲིངས་པའི་སྤྲིང་ཡིང་ནང། ཇི་སྐད་དུ། སེམས་ཀྱི་སྟོབས་ཆེན་མི་ཡིས་རྙེད་པ་གང་ཡིན་པ། །ཞེས་སོགས་ཀྱི་སྐབས་ནས་གསུངས་པ་ལྟར་མི་ཡི་ལུས་རྟེན་འདི་ཉིད་གནད་ཆེན་པོ་ཡིན་པར་རྟོགས་དགོས། ངན་འགྲོ་རྣམས་ནི་སྨྲོས་མི་དགོས་ཤིང་། བདེ་འགྲོའི་ནང་ནས་ལྷ་རྣམས་ནི་འདོད་པའི་བདེ་བ་ལ་གཡེང་ཆེ་བས་ཆོས་སྒྲུབ་པའི་མཐུན་རྐྱེན་ཞན་པ་ཡིན། དེ་བཞིན་གཟུགས་ཁམས་པའི་ལྷ་རྣམས་ཀྱང་ཏིང་ངེ་འཛིན་ལ་ཞེན་ཆེ་བས་དམ་ཆོས་སྒྲུབ་དཀའ། དེས་ན་དམ་ཆོས་སྒྲུབ་པའི་དོན་རྣམས་ནི་མི་ཡི་རྟེན་ལ་ཡོངས་སུ་རྫོགས་པ་ཡིན། དེ་ལྟའི་མི་ལུས་ཀྱི་རྟེན་ཐོབ་པ་དེ་ཡང་ཐོབ་པ་ཙམ་གྱིས་མི་ཕན་པར་དལ་འབྱོར་དོན་ཡོད་ཅིག་བྱ་དགོས། ཚེ་ལ་ལོང་མེད་ཅིང་ནམ་འཆི་ཆ་མེད་ཡིན་པས་སྐད་ཅིག་སྐད་ཅིག་གིས་མི་རྟག་པར་འཇིག་པས་དལ་རྟེན་དོན་མེད་དུ་མ་སོང་བ་ཞིག་དགོས་པས་མ་འོངས་པར་བྱ་སྙམ་ན་དོན་མེད་ངང་འཇིག་ཉེན་ཆེ་བས་དུས་ཚོད་དམ་འཛིན་བགྱིད་དེ་ཆུད་ཟོས་སུ་མ་སོང་བ་ཞིག་ཅི་ནས་ཀྱང་བྱ་གལ་ཆེ། ཇི་སྐད་དུ་རྗེ་མི་ལས། ང་འཆི་བས་འཇིགས་ཏེ་རི་ལ་བྲོས། །འཆི་མེད་གཉུག་མའི་རྒྱལ་ས་ཟིན། །ད་འཆི་བའི་འཇིགས་པ་ང་ལ་མེད། །ཅེས་གསུངས་པ་ལྟར་། རང་རེར་ཡང་སྤྱིར་འཆི་བའི་འཇིགས་པ་ཡོད་ཀྱང་། ནམ་འཆི་ངེས་མེད་ཀྱི་འཇིགས་པ་དེ་མེད་པ་ཡིན། མཁས་པའི་འཆི་བའི་འཇིགས་པ་སྐྱེ་ལུགས་ཇི་ལྟར་ཡིན་ཞེ་ན། སྐྱེས་པའི་མཐའ་མ་འཆི་རྒྱུ་ཡིན་པ་ཆོས་ཉིད་ཡིན་ཡང་། རང་གིས་བསག་གསོག་བགྱིས་པའི་ལོངས་སྤྱོད་དང་། གཉེན་ཉེ་བུ་ཚ་སོགས་ཀྱིས་མི་ཕན་པར་རང་ཉིད་གཅིག་པུར་འཆི་དགོས་པས་ལོང་མེད་ཀྱིས་རྒྱུད་སྐུལ་བ་དེ་བཞིན་མཁས་པའི་འཇིགས་པ་སྐྱེ་ལུགས་ཡིན། དལ་འབྱོར་སྙིང་པོ་ལེན་ཚུལ་ནི། གསང་སྔགས་རྡོ་རྗེ་ཐེག་པ་འདི་ཉིད་སྙིགས་དུས་ཚེ་ཐུང་ཞིག་ལ་དབང་པོ་རྣོ་བ་རྣམས་ལ་མཆོག་ཏུ་འགྱུར་བ་དང་། ལྷག་པར་སངས་རྒྱས་ཐམས་ཅད་ཀྱི་བསྟན་པ་ལ་སངས་སྔགས་ཀྱི་བསྟན་པ་འདི་ཉིད་མེད་པས་དཀོན་པ་ལས་ཀྱང་ཆེས་དཀོན་པ་ཞིག་ཏུ་གྱུར་མོད། དེ་ལའང་བླ་མ་གོང་མ་རྣམས་ཀྱི་གསུང་རྒྱུན་ལ་སྟོན་པ་སངས་རྒྱས་ཤཱཀྱ་ཐུབ་པའི་བསྟན་པ་ལ་གསང་སྔགས་ཀྱི་བསྟན་པ་ཡོད་པ་དང་། མ་འོངས་པའི་བསྐལ་བཟང་སངས་རྒྱས་མཐའ་མ་མོས་པའི་གནས་སྐབས་སུ་གསང་སྔགས་ཀྱི་བསྟན་པ་ཡོད་པར་གསུངས་པ་དང་། རི་བོ་དགེ་ལྡན་པའི་གསུང་རྒྱུན་ལ་མ་འོངས་པར་རྗེ་ཐམས་ཅད་མཁྱེན་པ་སངས་རྒྱས་སྤྱན་ལེགས་ཀྱི་སྐབས་སུ་སངས་སྔགས་བསྟན་པའི་ཆོས་འཁོར་སྐོར་བར་བྱེད་ཅེས་གསུང་སྲོལ་ཡོད། འོན་ཏང་དངོས་སུ་གསང་སྔགས་ཀྱི་བསྟན་པ་སངས་རྒྱས་ཤཱཀྱ་ཐུབ་པའི་བསྟན་པའི་སྐབས་ལས་གཞན་ལ་མེད། གསང་སྔགས་དེ་ལའང་རྒྱུད་སྡེ་བཞིའི་དབྱེ་བ་ཡོད་ཅིང། སྐབས་འདི་ཉིད་རྣལ་འབྱོར་བླ་མེད་ཀྱི་རྒྱུད་སྡེའི་ཁོངས་སུ་གཏོགས། རྣལ་འབྱོར་བླ་མེད་ཀྱི་རྒྱུད་ལའང་དབྱེ་བ་དུ་མ་ཡོད་པ་ལས་བླ་མེད་རྒྱུད་ལ་བཞེད་ཚུལ་གྱི་དབྱེ་བ་ཡོད་དམ་ཞེས་འདྲི་ན། བླ་མ་འགའ་ཞིག་གིས་དུས་འཁོར་འདི་ཉིད་རྒྱུད་ཐམས་ཅད་ཀྱི་རྩེ་མོ་ཡིན་པ་དང་། དེ་བཞིན་ས་སྐྱ་པས་ཀྱེ་རྡོར་དེ་བཞིན་རྒྱུད་ཐམས་ཅད་ཀྱི་མཆོག་དང་། རི་བོ་དགེ་ལྡན་པས་དཔལ་གསང་བ་འདུས་པ་མཆོོག་ཏུ་བརྩི་བ་ཡིན། དེ་བཞིན་རང་རེ་བཀའ་བརྒྱུད་པས་འཁོར་ལོ་བདེ་མཆོག་གི་རྒྱུད་དེ་བཞིན་རྒྱུད་ཐམས་ཅད་ཀྱི་ཡང་སྙིང་དུ་བརྩི་བ་ཡིན། དེ་ལྟའི་དབང་བསྐུར་བྱེད་པ་ལ་བདེ་མཆོག་རྒྱུད་ཀྱི་འབྱུང་ཁུངས་ཀྱི་ལོ་རྒྱུས་སང་ཉིན་འཆད་རྒྱུ་ཡིན། སྟ་གོན་དངོས་ལ་འཇུག་པ་ལས། སློབ་མ་སྟ་གོན་ལ་འཇུག་པར་རིམ་པ་འགའ་ལས། ཐོག་མར་ཀུན་སློང་བཅོས་པའི་རིམ་པ་ཡིན། ཀུན་སློང་བཅོས་ཚུལ་ནི་བྱ་རྒྱུད་དང་སྤྱོད་རྒྱུད་གཉིས་ཀྱི་ནང་བསྟན་ཡོད། གསང་སྔགས་ཀྱི་དཀྱིལ་འཁོར་དུ་ཞུགས་པ་ལ་རིགས་གསུམ་དུ་ཡོད་པ་ལས། རིགས་གཅིག་ནི་ཚེ་འདིའི་དོན་གཉེར་གྱི་སླད་དུ་གསང་སྔགས་ཀྱི་ཉམས་ལེན་བྱེད་པ་དང་། རིགས་གཅིག་ནི་ཕྱི་མའི་དོན་གཉེར་ཕྱིར་དུ་ཉམས་སུ་ལེན་པ་དང་། རིགས་གཅིག་གིས་ཐར་པ་དང་ཐམས་ཅད་མཁྱེན་པའི་དོོན་གཉེར་བྱས་ཏེ་ཉམས་སུ་ལེན་པ་སྟེ་གསུམ་དུ་ཡོད་པ་ལས་མཐའ་མའི་ཀུན་སློང་དང་ལྡན་པ་ཞིག་གིས་གསང་སྔགས་ཀྱི་དཀྱིལ་འཁོར་དུ་ཞུགས་ཆོག་པ་ཡིན། སྐབས་འདིར་ཀུན་སློང་བཅོས་པ་ཞེས་འཇིག་རྟེན་ལས་འདས་པའི་དངོས་གྲུབ་ཀྱི་དཀྱིལ་འཁོར་ཞལ་ཕྱེ་བ་ཡིན་པས་ཀུན་སློང་ཡང་དེའི་ཚུལ་དང་མཐུན་པ་ཞིག་ངེས་པར་དུ་དགོས། སྤྱིར་ཀུན་སློང་བཅོས་ཕྱིར་དུས་ཚོད་ཕྲན་བུ་བཏང་ནས་ཀུན་སློང་བཅོས་དགོས་པ་ལས་འཕྲལ་དུ་བཅོས་ཐབས་མེད། འོན་ཀྱང་གནས་སྐབས་དེར་ཚུལ་དང་མཐུན་པ་ཞིག་བཅོས་དགོས། དེས་ན་འདི་ཉིད་རིམ་པ་དང་པོ་ཡིན་པས་ཤིན་ཏུ་གནད་ཆེ། གཉིས་པ་གསོོལ་བ་འདེབས་པ་ནི། དགའ་ཆེན་ཁྱོད་བདག་སོགས་ཀྱིས་བསྟན་ཏེ། དེ་ཡང་དགའ་བ་ཆེན་པོ་ཞེས་པ་ནི་རྡོ་རྗེ་འཆང་གི་མཚན་ཡིན། དགའ་ཆེན་ཞེས་པའི་ཚིག་དེ་ཡུལ་ཅན་བདེ་བ་ཆེན་པོའི་ཡེ་ཤེས་དང་ཡུལ་སྟོང་པ་ཉིད་དབྱེར་མ་མཆིས་པར་མཚོན་པ་ཡིན། སྐབས་འདིར་རང་གི་བླ་མ་དང་དགའ་བ་ཆེན་པོ་གཉིས་དབྱེར་མ་མཆིས་པའི་དོན་ཡིན། དེ་ཡང་རང་གི་སློབ་མ་ལ་ཉེ་བའི་ཚིག་གི་དོད་དུ་བརྗོད་པ་ཡིན། ད་ལན་བུམ་དབང་ཁོ་ནའི་དབང་བྱེད་རྒྱུ་ཡིན་ཞེས་གསུངས། དེ་མཇུག་ཐུན་མོང་གི་སྡོམ་པ་བཟུང་བ་དང་ཐུན་མིན་གྱིས་སྡོམ་པ་བཟུང་བ་གཉིས་ལས་ཐུན་མོང་གི་སྡོམ་པ་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་སྩལ། དེ་ཡང་འདུས་པ་ཀུན་གྱིས་གོ་བརྡ་འཕྲོད་ཕྱིར་ཨིན་ཇི་དང་རྒྱ་སྐད་ཀྱི་སྒོ་ནས་སྐྱབས་གསུམ་རྗེས་ཟློས་ཀྱི་སྐུལ་མ་མཛད། དེ་མཇུག་ཁྱོར་ཆུ་དང་། དཔུང་སྐུད། རྩྭ་ཀུ་ཤ་བཅས་སློབ་མ་བརྟག་པའི་ཕྱིར་འདུས་པ་ཀུན་ལ་འགྲེམས་སྤེལ་མཛད་པ་བཅས་སྔོན་འགྲོ་སྟ་གོན་སྐབས་ཀྱི་མཛད་རིམ་རགས་པ་ཙམ་ངོ་སྤྲོད་ཀྱི་ཚུལ་དུ། བསྟན་འཛིན་རྣམ་རྒྱལ་ནས། 20170207_Chakrasamvara Empowerment Day2 Preliminary Practice
Right-Column-Pics4.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་