ངེས་དོན་སྒྲོན་མེ་ལས་བླ་མའི་རྣལ་འབྱོར་གྱི་གསུང་ཆོས་ཐུན་གཉིས་པ།

ཕྱི་ལོ་༢༠༡༧ ཟླ་བ་༢ ཚེས་༩ ཉིན་ཆོས་ཐུན་གཉིས་པ་གུང་ཡོལ་ཕྱག་ཚོད་གཉིས་པའི་ཐོག་དཔལ་༸རྒྱལ་དབང་ཀརྨ་པ་མཆོག་གིས་བཀའ་སྩལ་དོན་དུ།

ད་ནང་ཞོགས་པ་བླ་མའི་རྣལ་འབྱོར་གྱི་འཕྲོས་ནས་ཞུ་ན། དེ་མ་ཞུས་གོང་གསལ་བཤད་ཅིག་ཞུ་ན། སྤྱིར་བཏང་ཐུན་བཞི་བླ་མའི་རྣལ་འབྱོར་དང་སྔོན་འགྲོ་འབུམ་བཞིའི་སྐབས་ཀྱི་བླ་མའི་རྣལ་འབྱོར་གཉིས་ལ་ཁྱད་པར་ཡོད། བླ་མའི་རྣལ་འབྱོར་ཡིན་པ་མཚུངས་ཀྱང་ཀཾ་ཚང་ནང་ལ་བླ་མའི་རྣལ་འབྱོར་དུ་མ་ཡོད་ཀྱང་ཐུན་བཞི་བླ་མའི་རྣལ་འབྱོར་ཁྱད་པར་དུ་འཕགས་པ་ཡིན། དེ་རྗེས་མ་ཞུ་རྒྱུ་ཡིན། འོན་ཀྱང་དབང་དངོས་གཞིའི་སྐབས་ཆོས་བརྒྱུད་ཁག་གི་མི་སྣ་མང་པོ་ཕེབས་ཡོད་ཅིང་། དེ་ཐམས་ཅད་ཀྱང་རང་རང་ལུགས་ཀྱི་བླ་མའི་རྣལ་འབྱོར་རྒྱས་འབྲིང་ཇི་ལྟར་ཡོད་པ་ཡིན་ཀྱང་དེ་ཉིད་སྒོམ་ན་ལེགས། དེ་དག་སྒོམ་དགོས་པའི་རྒྱུ་མཚན་ནི། འཁོར་ལོ་སྡོམ་པའི་དབང་ཞུས་པ་གཅིག་པུས་མི་ཆོག་པར། དེ་དག་ཀུན་གཞིའི་སྟེང་དུ་འཇོག་པའི་བག་ཆགས་ཀྱི་ས་བོན་ཞིག་བཞག་པ་ཡིན། དེ་དག་གི་འབྲས་བུ་བཟང་པོ་བྱུང་བའི་ཕྱིར་དུ་བླ་མའི་རྣལ་འབྱོར་རྒྱས་བསྡུས་གང་ཡིན་ཡང་སྒོམ་དགོས་པ་ཡིན། དེའི་རྗེས་ལ་སྐབས་སུ་བབ་པ་ངེས་དོན་སྒྲོན་མེའི་ནང་གསུངས་པ་བཞིན་ཞུ་ན། དེ་ནི་ཀཾ་ཚང་ལུགས་ཀྱི་བླ་མའི་རྣལ་འབྱོར་ཡིན། སྒོམ་ཚུལ་ནི། རང་གི་སྤྱི་བོའི་ཐད་ཀྱི་མདུན་གྱི་ནམ་མཁར་ཞལ་རང་ཉིད་ལ་ཕྱོགས་པ་སེང་གེ་བརྒྱད་ཀྱིས་བཏེག་པའི་ཁྲིའི་སྟེང་པད་ཟླའི་གདན་གྱི་སྟེང་དུ་བླ་མ་རྡོ་རྗེ་འཆང་དེ་ཉིད། ངོ་བོ་རང་གི་རྩ་བའི་བླ་མ་ཡིན་པ་ལ་རྣམ་པ་སངས་རྒྱས་རྡོ་རྗེ་འཆང་རྒྱན་ཆ་ལུགས་ཀྱིས་བརྒྱན་པ་བཞུགས་པ་ཞིག་སྒོམ་དགོས། བླ་མ་དེ་གང་ཟག་དཀྱུས་མ་ལྟ་བུ་མིན་པར་སངས་རྒྱས་ཀྱི་རྣམ་པར་སྒོམ་དགོས། དེ་ལྟར་སྒོམ་དགོས་པའི་རྒྱུ་མཚན་ནི། བླ་མ་སངས་རྒྱས་སུ་དྲན་པའི་ཕྱིར་དུ་ཡིན། འོ་ན་སངས་རྒྱས་ཞེས་པ་དེ་ཇི་ལྟ་བུ་ཡིན་ཞེ་ན། མི་མང་པོ་ཞིག་གི་བསམ་བློའི་ནང་ལམ་སེང་སངས་རྒྱས་ཀྱི་སྐུ་འདྲ་ལྟ་བུ་ཞིག་བློ་ལ་འཁོར་གྱི་ཡོད། སྤྱིར་སངས་རྒྱས་ནི་ཕྱི་ལོའི་སྔོན་གྱི་དུས་རབས་ལྔ་པ་ཙམ་གྱི་སྔོན་དུ་ཕེབས་ཡོད། ད་ལྟ་སངས་རྒྱས་ཀྱི་སྐུ་འདྲ་རྙིང་ཤོས་དང་སངས་རྒྱས་བྱོན་པའི་བར་ལོ་ངོ་ལྔ་བརྒྱ་དྲུག་བརྒྱ་ཙམ་ཁྱད་པར་ཡོད། དངོས་འབྲེལ་བཤད་ན་སངས་རྒྱས་ཅེས་པ་ཇི་འདྲ་ཞིག་ཡོད་མེད་ཚོད་དཔག་བྱེད་དཀའ་བ་ཡིན། གལ་ཏེ་ང་ཚོ་སངས་རྒྱས་བཞུགས་པའི་སྐབས་སུ་ཡོད་པ་ཡིན་ཚེ་ཕལ་ཆེར་སངས་རྒྱས་ངོ་ཤེས་རྒྱུ་ཁག་པོ་ཡོད། དཔེར་ན། ལོ་རྒྱུས་ཤིག་ཞུ་ན། སངས་རྒྱས་ཆུ་བོ་ནཻརྫྙཎའི་འགྲམ་དུ་ལོ་དྲུག་གི་རིང་དཀའ་བ་སྤྱད་པའི་རྗེས་སུ་བུ་མོ་ལེགས་སྐྱེས་མས་འོ་ཐུག་ཕུལ་བའི་ཚེ་ན་སངས་རྒྱས་ཇི་བཞིན་ངོ་མ་ཤེས་པར་ཤིང་གི་ལྷ་ཞིག་ལ་ཕུལ་བའི་གནས་ཚུལ་ཡོད། ཁོོང་གིས་ལོ་དྲུག་རིང་དཀའ་བ་སྤྱད་པ་ལ་བརྟེན་ནས་སྐུ་ཤ་མ་ལུས་སྐམ་ནས་ཤིང་གི་མདོག་ལྟར་གྱུར་པས་ཤིང་གི་ལྷ་རུ་མཐོང་བས་བྲམ་ཟེའི་བོ་མོ་ལེགས་སྐྱེས་ཉིད་ཀྱང་འཁྲུལ་པ་ཡིན། ཐོ་རངས་བྱང་ཆུབ་ལྗོན་ཤིང་གི་འོག་ཏུ་མངོན་པར་རྫོགས་པ་སངས་རྒྱས་པའི་ཚེ་འཇམ་ཐིང་ཐིང་ཞིག་གི་ངང་ནས་སངས་རྒྱས་པ་རེད་མ་གཏོགས་འུར་འུར་ཟིང་ཟིང་གི་ངང་ནས་སངས་རྒྱས་པ་མིན། རྒྱ་གར་དུ་ཤིང་སྡོང་འོག་ཏུ་སྡོད་མཁན་མི་དུ་མ་ཞིག་ཡོད། དེས་ན་ད་ལྟ་འདིར་འཛོམས་པའི་མི་ཀུན་སྐབས་དེེ་དུས་ཡོད་པ་ཡིན་ན་ཤེས་དཀའ་བ་ཡིན། སངས་རྒྱས་ཀྱི་བསམ་གྱིས་མི་ཁྱབ་པའི་རྣམ་ཐར་བཤད་སྐབས་སེམས་ནང་འཆར་ཁག་པོ་ཡོད། བླ་མ་སངས་རྒྱས་སུ་སྒོམ་ཞེས་པ་དེ་བླ་མ་དེ་ཉིད་སངས་རྒྱས་སུ་སྒོམ་རྒྱུ་དེ་ཡིན། བླ་མ་དང་སངས་རྒྱས་གཉིས་ཐ་དད་མེད་པར་སྒོམ་པ་དེ་བླ་མ་དང་སངས་རྒྱས་གཉིས་ཐག་ཇི་ཉེར་འགྲོ་བའི་སླད་དུ་བླ་མ་སངས་རྒྱས་སུ་སྒོམ་པ་ཡིན། བླ་མ་རྡོ་རྗེ་འཆང་གི་སྟེང་དུ་བརྒྱུད་པའི་བླ་མ་རྡོ་རྗེ་འཆང་ཆེན་ནས་རང་གི་རྩ་བའི་བླ་མའི་བར་དུ་ཐོག་བརྩེགས་ཀྱི་ཚུལ་དུ་སྒོམ། དེའི་མཐའ་སྐོར་དུ་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱིི་བླ་བརྒྱུད་རྣམས་སྤྲིན་འཁྲིགས་པ་ལྟར་སྒོམ་དགོས། དེ་བཞིན་སངས་རྒྱས་བྱང་སེམས་ཡི་དམ་རྣམས་ཀྱིས་བསྐོར་བ་སྒོམ། དེ་ལྟར་མ་ནུས་ན་བླ་མ་ཁོ་རང་ལ་དམིགས་ནས་དཀོན་མཆོག་ཀུན་འདུས་ཀྱི་ངོ་བོོར་སྒོམ་དགོས། དེའི་སྐབས་བླ་མ་དཀོན་མཆོག་ཀུན་འདུས་སུ་སྒོམ་པ་ནི་ཤིན་ཏུ་གལ་གནད་ཆེན་པོར་མཐོང། ཆོས་རྗེ་འབྲུག་པ་ཀུན་ལེགས་ཀྱིས། དེང་སང་ཆོས་པ་འགའ་ཞིག་གིས། མཆོད་པ་ཐམས་ཅད་ཡོངས་སྤངས་ནས། །བླ་མའི་མཆོད་པ་བརྩོན་པར་བྱ། །དེའི་འགྲེལ་བཤད་ཕལ་སྐད་ཀྱིས་སྒོ་ནས་བཤད་ན། བླ་མའི་མཆོད་པ་མ་གཏོགས་གཞན་མ་བྱེད་ཅེས་པ་ལྟ་བུ་ཡོད། དེ་ལྟའི་སྒོ་ནས་ཡི་དམ་དང་བླ་མ་ཐ་དད་དུ་ཕྱེ། ཡི་དམ་ཟུར་དུ་བཞག སངས་རྒྱས་ཟུར་དུ་བཞག བྱང་སེམས་ཟུར་དུ་ཕྱེ་ནས་བླ་མ་ཟེར་བ་དེ་འོད་མདངས་འཚེར་བ་ལྟ་བུ་སྒོམ་པ་ནི་རང་གི་རྣམ་རྟོག་དང་འདྲེས་ནས་སྒོམ་པ་ཡིན།

མཆོད་པ་ལ་སེམས་ཅན་གྱི་སྲོག་བཅད་ཅིང་ཤ་དང་ཆང་གི་མཆོད་པ་འབུལ། ལུང་དོན་དེ་ལྟར་མིན། ལུང་གི་དོན་ནི། འཁོར་ལོ་སྡོམ་པ་སོགས་ཡི་དམ་ཉིད་བླ་མའི་ངོ་བོར་སྒོམ་དགོས་པའི་དོན་ཡིན། བླ་མ་དང་ངོ་བོ་ཐ་དད་མེད་པར་སངས་རྒྱས་དང་། བྱང་སེམས་ཡི་དམ་རྣམས་ངོ་བོ་གཅིག་ཏུ་སྒོམ་པ་ནི་བླ་མའི་རྣལ་འབྱོར་སྒོམ་པ་ཡིན། ངོ་བོ་ཐ་དད་མེད་པ་དེ་དག་ལ་གདུང་ཤུགས་དྲག་པོའི་སྒོ་ནས་གསོལ་བ་འདེབས་དགོས། དངོས་སུ་བཞུགས་པའི་མོས་པ་བྱས་ནས་ཡན་ལག་བདུན་པའི་སྒོ་ནས་ཚོགས་བསགས་དགོས། དེ་ནས་རྡོར་ཏིལ་མ་འདོན་ཡང་རུང་། དུས་གསུམ་མཁྱེན་པས་མཛད་པའི་བླ་མའི་རྣལ་འབྱོར་འདོན་ཡང་ཆོག་པ་ཡིན།

དེ་ཡང་འབྲུག་པ་ཀུན་ལེགས་ཀྱིས་ཇི་སྐད་དུ། དེང་སང་གི་ཆོས་པ་ཚོས་བླ་མ་ལ་གསོལ་བ་འདེབས་པ་ཡིན་ཟེར་ནས་རང་ཉིད་ལ་སྨོད་པ་ཤ་སྟག་བྱེད་པ་དང་། རང་ཉིད་ལ་སྐྱོབ་རོགས་ཞེས་སྡུག་སྐད་ཁོ་ན་འདོན་པ་ནི་གསོལ་འདེབས་མཚན་ཉིད་པ་མིན། འོ་ན་མོས་གུས་དང་ཕྱག་ཆེན་ཟུང་དུ་འབྲེལ་བའི་སྒོ་ནས་སྒོམ་པ་འདི་གནད་གལ་ཆེ་བ་མ་གཏོགས་རང་ཉིད་ལ་སྨད་ཅིང་གདུང་ཤུགས་འབོད་པ་འདི་གནད་ཆེ་བར་མ་མཐོང་གསུངས།

མདོར་ན་ཐུན་བཞི་བླ་མའི་རྣལ་འབྱོར་ཟེར་བ་འདི་སྔ་དྲོ་ཐུན་གཉིས་དང་ཕྱི་དྲོ་ཐུན་གཉིས་ཀྱི་སྒོ་ནས་ཉམས་སུ་ལེན་ཞིང་ཐུན་ཚོད་ལས་མ་ཉམས་པར་ཉམས་སུ་ལེན་དགོས་པ་གནད་ཆེ་བ་ཡིན་ཞེས་བཀའ་སྩལ། བསམ་གཏན་མཐར་ཕྱིན་ནས་ཕབ།

Right-Column-Pics29.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་