བཀའ་བརྒྱུད་སྨོན་ལམ་ཐེངས་སོ་ལྔ་པའི་སྐབས་ཕེབས་པའི་རྒྱ་བལ་འབྲུག་གསུམ་གྱི་དགེ་བཙུན་རྣམས་ཀྱི་སྔོན་འགྲོའི་སྤྱོད་ལམ་རྒྱུགས་བཞེས་མཛད་པ།

ཕྱི་ལོ་ ༢༠༡༨ ཟླ་བ་ ༢ པའི་ཚེས་ ༢༢ དང་ ༢༣  ཉིན་གཉིས་རིང་། ཕྱི་དྲོ་ཕྱག་ཚོད་བདུན་དང་ཕྱེད་ཐོག་ཡོངས་དགེ་གཏེར་སྒར་དགོན་གྱི་འདུ་ཁང་ནང་སྔ་ལོ་བཞིན་བཀའ་བརྒྱུད་སྨོན་ལམ་ཐེངས་སོ་ལྔ་པའི་སྐབས་ཕེབས་པའི་རྒྱ་བལ་འབྲུག་གསུམ་གྱི་དགེ་བཙུན་རྣམས་ཀྱི་སྔོན་འགྲོའི་སྤྱོད་ལམ་རྒྱུགས་བཞེས་སླད། གཟུ་དཔང་མཛད་པོ་གདན་ས་རུམ་བཏེག་བཤད་གྲྭའི་མཁན་པོ་སྐལ་བཟང་ཉི་མ་དང་མཁན་པོ་དགའ་དབང་། གདན་ས་དཔལ་སྤུངས་ཤེས་རབ་གླིང་གི་མཁན་པོ་ཐུབ་བསྟན་ཀརྨ། གདན་ས་རིག་པའི་རྡོ་རྗེའི་གཙུག་ལག་སློབ་གཉེར་ཁང་གི་མཁན་པོ་ནོར་བུ་རྒྱལ་མཚན། མི་རིགས་འབོ་དཀར་དགོན་གྱི་དབུ་མཛད་ཆོས་འཕེལ་གྱི་སྐུ་ཚབ་དགེ་སློང་ཚེ་རིང་བཅས་རྣམ་པ་ལྔའི་གཟིགས་སྐྱོང་འོག་རྒྱན་བབས་ཀྱི་རིམ་པ་བཞིན་ཐོག་མར། རུམ་བཏེག་བཤད་སྒྲུབ་ཆོས་འཁོར་གླིང་།  དཔལ་སྤུངས་བཙུན་དགོན་ཡེ་ཤེས་རབ་རྒྱས་གླིང་། དཔལ་སྤུངས་ཤེས་རབ་གླིང་། ཁྲ་འགུ་སྒྲོན་མ་ལྷ་ཁང་། གཏེར་སྒར་དགོན། དཔལ་ངེས་དགོན། སྐྱེ་དགུའི་བདག་མོ་ཆོས་གླིང་། འོད་གསལ་ཀརྨ་ཐེག་མཆོག་གླིང་། དིལ་ཡག་དགོན། དཔལ་ཆེན་ཆོས་གླིང་། ཁྲ་འགུ་བཀྲ་ཤིས་ཆོས་གླིང་། ལེགས་བཤད་གླིང་། བསམ་གཏན་གླིང་། འབོ་དཀར་ངེས་དོན་ཆོས་འཁོར་གླིང་། ལ་བྷ་རིག་པའི་རྡོ་རྗེའི་གཙུག་ལག་སློབ་གཉེར་ཁང་། བསམ་གྲུབ་དར་རྒྱས་ཆོས་གླིང་། བན་ཆེན་ཕུན་ཚོགས་དར་རྒྱས་གླིང་།  ངེས་བརྟན་རབ་རྒྱས་གླིང་། གནས་མདོ་བཀྲ་ཤིས་ཆོས་གླིང་། ཀརྨ་སྒྲུབ་སྡེ་དཔལ་མོ་ཆོས་ལྡིང་། ཟུར་མང་བཤད་སྒྲུབ་ཆོས་འཁོར་གླིང་། བཙུན་དགོན་ཐེག་ཆེན་ལེགས་བཤད་གླིང་། བཙུན་དགོན་བསམ་གཏན་གླིང་། བཙུན་དགོན་ཀརྨ་སྒྲུབ་བརྒྱུད་དར་རྒྱས་གླིང་། བཅས་འདི་ལོར་སྤྱོད་ལམ་རྒྱུགས་བཞེས་ལ་ཕེབས་མཁན་དགོན་སྡེ་ཁག་ཉི་ཤུ་རྩ་བཞི་པོ་རྣམས་མཚན་མོ་ཆུ་ཚོད་བཅུ་གཅིག་བར་སྤྱོད་ལམ་རྒྱུགས་བཞེས་བསྐྱངས།
དེ་ཡང་སྡེ་ཚན་རྣམ་པ་ལྔའི་སྒོ་ནས་རྒྱུགས་བཞེས་མཛད་དེ། སྡེ་ཚན་ལྔ་ནི་ཐོག་མར་ན་བཟའ་མནབ་ཚུལ།  གཉིས་པར་ཕྱག་འཚལ་ཚུལ། གསུམ་པར་འགྲོ་འདུག་གཉིས། བཞི་པར་ན་བཟའ་ལྟེབ་ཚུལ། ལྔ་པར་གྲངས་དང་དུས་ཏེ་རྣམ་པ་ལྔའི་སྒོ་ནས་རེ་རེ་བཞིན་གོང་གསལ་དགོན་ཁག་རྣམས་ཀྱི་རྒྱུགས་བཞེས་མཛད་དེ། ཐོག་མར་དགེ་སློང་རྣམས་ཀྱི་ཆོས་གོས་རྣམ་གསུམ་མནབ་ཚུལ་དང་ལྟེབ་ཚུལ། གདིང་བ་ཁ་སྒྱུར་ཚུལ། སྐུ་ཕྱག་འབུལ་ཚུལ། གསོལ་ཚིགས་བཞེས་ཚུལ། ཚོགས་སུ་ཕེབས་བཞུགས་མཛད་ཚུལ། དབུ་ཞྭ་མནབ་ཚུལ། རྒྱལ་བའི་བཀའ་འགྱུར་རིན་པོ་ཆེ་ཆོས་སྐོར་དུ་གདན་འདྲེན་སྐབས་གོམ་སྟབས་ཇི་ལྟར་འདོར་ཚུལ་བཅས་ཀྱི་སྤྱོད་ལམ་རྒྱུགས་བཞེས་ཡོངས་རྫོགས་རིམ་བཞིན་བཞེས། དེ་བཞིན་དགེ་སློང་རྣམས་ཀྱི་རྒྱུགས་བཞེས་གྲུབ་མཚམས་དགེ་ཚུལ་རྣམས་ཀྱི་སྤྱོད་ལམ་ཡང་དེ་དེ་བཞིན་དུ་རེ་རེ་བཞིན་རྒྱུགས་བཞེས་མཛད། དེ་ཡང་དུས་ཡུན་མགྱོགས་བུལ་གྱི་ཚད་གཞི་ཆུ་ཚོད་ཀྱི་དུས་བཀག་ཐོག་གྲ་སྒྲིག་གང་ལེགས་དང་ཚགས་ཚུད་ཚད་ལྡན་རྣམས་ལ་བཀའ་བརྒྱུད་སྨོན་ལམ་སྐབས་སོ་དྲུག་པའི་ཉིན་མཐའ་མར་བྱ་དགའ་གསོལ་རས་སྩལ་རྒྱུའི་གཏན་འབེབས་མཛད་པ་ལྟར་སྩལ་རྒྱུ་ཡིན།  

བསྟན་འཛིན་རྣམ་རྒྱལ་ནས།

20180222Examination of Monastic Forms

Right-Column-Pics36.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་