ཕྱི་ལོ་ ༢༠༡༨  ཟླ་ ༣ ཚེས་ ༣  ཉིན་གྱི་སྔ་དྲོ་ཆུ་ཚོད་བདུན་པའི་ཐོག་༸སྐྱབས་རྗེ་རྒྱལ་བའི་རྒྱལ་ཚབ་རིན་པོ་ཆེ་མཆོག་དང་། སྐྱབས་རྗེ་མི་འགྱུར་རིན་པོ་ཆེ་རྣམ་གཉིས་སྨོན་ལམ་ཆོས་ར་ནས་ཆིབས་འཕྲུལ་ཐོག་རྡོར་གདན་མཆོད་རྟེན་ཆེན་མོར་ཆིབས་སྒྱུར་བསྐྱངས་སྐབས་རྡོར་གདན་བྱང་ཆུབ་མཆོད་རྟེན་འཛིན་སྐྱོང་ཚོགས་པའི་དྲུང་ཆེ་སྐུ་ཞབས་སྣང་མཛད་རྡོ་རྗེ་ལགས་སོགས་གནད་ ཡོད་མི་སྣ་རྣམས་ནས་ནས་བྱོན་བསུའི་མཇལ་དར་ཕུལ་བ་ཕྱིར་སློག་མཛད་རྟིང་བཀའ་འགྱུར་ཆོས་སྐོར་གྱི་སྟ་གོན་མཛད་ཡུལ་དུ་གཟིགས་ཞིབ་ལེགས་པར་བསྐྱངས།  

དེ་མཇུག་༸སྐྱབས་རྗེ་རིན་པོ་ཆེ་རྣམ་གཉིས་ཀྱིས་དབུས་པའི་འཇང་གི་བཀའ་འགྱུར་པོད་བརྒྱ་དང་བཅུ་བཞུགས་པ་དེ་དག་གདན་མི་དགོན་སྡེ་ཁག་ནས་འདེམས་སྒྲུག་གིས་རུམ་བཏེག་གདན་སའི་རྡོར་སློབ་དང་སྒྲུབ་དཔོན་རྣམ་གཉིས་གཙོས་དགེ་སློང་བརྒྱ་དང་བཅུ་ཡོད་པའི་ཁོངས་ནས་ཕྱི་རྒྱལ་གྱི་དགེ་སློང་མ་ཡང་ལྔ་ཙམ་མཆིས་ཤིང་། དེ་དག་ཡོངས་ནས་རྒྱལ་བའི་བཀའ་འགྱུར་རིན་པོ་ཆེའི་གླེགས་བམ་རེ་རེ་བཞིན་ཕྲག་པ་གཡོན་དུ་ཐོགས་ཏེ་བཀའ་འགྱུར་ཆོས་སྐོར་གདན་འདྲེན་ཚུལ་གྱི་སྤྱོད་ལམ་རྒྱུགས་སྤྲོད་སྐབས་ཇི་ལྟར་ལམ་སྟོན་མཛད་པ་ལྟར་དུང་རྒྱ་སྤོས་སྣ་དང་བཅས་ཐོག་མར་མཆོད་རྟེན་རིན་པོ་ཆེའི་ཤར་སྒོའི་ནང་སྐོར་ནས་དབུ་འཛུགས་ཀྱིས་ཕྱི་སྐོར་དུ་རིམ་གྱིས་ཕེབས། དགེ་སློང་གཞན་རྣམས་ཀྱང་ཐུབ་པའི་མཚན་སྔགས་དབྱངས་རྟ་སྙན་པོས་འདོན་བཞིན་རིམ་གྱིས་གཤེགས།

ཆོས་སྐོར་དུ་ཕེབས་སྐབས་ཕེབས་ལམ་གྱི་གཡོན་གྲལ་མཐའ་སྐོར་དུ་ཕྱི་ནང་དད་ལྡན་མི་མང་སྟོང་ཚོ་ལ་ཉེ་བས་ལག་ཏུ་སྲིད་ན་རིང་བའི་དར་དཀར་དང་། ཡིད་དུ་འོང་བའི་མེ་ཏོག །དྲི་ངད་རབ་ཏུ་ལྡང་བའི་བདུག་སྤོས་སོགས་མཆོད་པའི་ཡོ་བྱད་སྣ་ཚོགས་པ་ལག་ཏུ་ཐོགས་ཏེ། དད་གུས་ཆེན་པོས་ཕེབས་ལམ་གཡས་གཡོན་དུ་སྒྲེང་སྟེ་ངག་ནས་ཐུབ་པའི་གཟུངས་སྔགས་སྙན་པའི་དབྱངས་ཀྱིས་འདོན་བཞིན་དུ་རྒྱལ་བསྟན་དར་ཞིང་འགྲོ་ཀུན་བདེ་བའི་སྨོན་ལམ་འདེབས་བཞིན་དགེ་སློང་རྣམས་གཤེགས་ཤུལ་གྱི་མཇུག་ཏུ་དལ་གྱིས་སྙེགས།   

དེ་མཇུག་༸སྐྱབས་རྗེ་རྒྱལ་བའི་རྒྱལ་ཚབ་མཆོག་དང་སྐྱབས་རྗེ་མི་འགྱུར་རིན་པོ་ཆེ་རྣམ་གཉིས་དང་བཀའ་འགྱུར་ཆོས་སྐོར་ཞུ་མི་དགེ་སློང་རྣམས་ཕྱིར་ཕེབས་ཀྱིས་བཞུགས་གྲལ་དུ་འཁོད་དེ་སྨོན་ལམ་ཆོས་རར་བཞུགས་པའི་དགེ་བཙུན་ཡོངས་དང་ལྷན་དུ་བཀའ་འགྱུར་གླེགས་བམ་རྣམས་ཕན་ཚུན་ཆ་བགོས་ཀྱིས་གསུང་གི་གདངས་དབྱངས་གྲིམས་ལྷོད་རན་པའི་སྒོ་ནས་དུས་ཡུན་ཆུ་ཚོད་གཉིས་ཙམ་གྱི་ནང་དབུ་ནས་མཇུག་བར་དག་སྒྲོགས་ལེགས་པར་ཞུས་པའི་གནས་ཚུལ་སྙིང་བསྡུས་སུ། བསྟན་འཛིན་རྣམ་རྒྱལ་ནས།

Right-Column-Pics13.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་