གྲུབ་དབང་༸སྐྱབས་རྗེ་མཉན་པ་རིན་པོ་ཆེའི་ཕྱག་ཆེན་གངྒཱ་མའི་བཀའ་ཁྲིད་ཉིན་དང་པོའི་ཆོས་ཐུན་དང་པོ།

གྲུབ་དབང་༸སྐྱབས་རྗེ་མཉན་པ་རིན་པོ་ཆེའི་ཕྱག་ཆེན་གངྒཱ་མའི་བཀའ་ཁྲིད་ཉིན་དང་པོའི་ཆོས་ཐུན་དང་པོ།
དེ་ཡང་ཕྱི་ལོ་ ༢༠༡༩ ལོའི་བཀའ་བརྒྱུད་སྨོན་ལམ་ཀྱི་སྔོན་འགྲོའི་གསུང་ཆོས་སྐབས་སུ་བདག་ཅག་དཔལ་ལྡན་དུས་གསུམ་མཁྱེན་པའི་རྗེས་འཇུག་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་༸དཔལ་རྒྱལ་བའི་དབང་པོ་སངས་རྒྱས་ཀརྨ་པ་ཆེན་པོ་མཆོག་རེ་ཞིག་སྐུ་དངོས་རྒྱ་གར་འཕགས་པའི་ཡུལ་དུ་ཆིབས་བསྒྱུར་བཀའ་དྲིན་བསྐྱངས་མ་ཐུབ་མོད། འོན་ཀྱང་མགོན་པོ་གང་གིས་སྒྲུབ་བརྒྱུད་ཀརྨ་ཀཾ་ཚང་གི་དད་ལྡན་སློབ་ཚོགས་རྣམས་ལ་ཐུགས་རྗེའི་གཟིགས་པ་ཆེན་པོས་ནམ་ཡང་མི་འདོར་བར་མཛད་དེ། ད་ལན་གྱི་བཀའ་བརྒྱུད་སྨོན་ལམ་སྔོན་འགྲོའི་བཀའ་ཆོས་སྐབས་སུ་སྒྲུབ་བརྒྱུད་བསྟན་པའི་གསལ་བྱེད་དམ་པ་༸གྲུབ་དབང་སངས་རྒྱས་མཉན་པ་རིན་པོ་ཆེ་མཆོག་ལ་རྒྱ་གར་འཕགས་པའི་ཡུལ་གྱི་གྲུབ་ཐོབ་ཀུན་གྱི་མེས་པོ་རྗེ་བཙུན་ཏི་ལོ་པས་དཔལ་ནཱ་རོ་པ་ལ་ཤར་ཆུ་བོའི་གངྒཱའི་འགྲམ་དུ་གདམས་པ་ཕྱག་ཆེན་གངྒཱ་མ་ཞེས་པ། མདོ་རྒྱུད་ཀུན་གྱི་ཉིང་ཁུ་གཅིག་པུར་གྱུར་པ། འོད་གསལ་གནས་ལུགས་ཕྱག་རྒྱ་ཆེན་པོའི་རང་བཞིན་གསལ་བར་བསྟན་པའི་གཞུང་ཆེས་ཟབ་ཅིང་བརླིང་བ། རྟོག་གེ་བ་རྣམས་ཀྱིས་ནམ་ཡང་སྤྱོད་ཡུལ་དུ་མི་འགྱུར་བའི་སྦས་གསང་བླ་ན་མེད་པ་དེ་ཉིད་ཀྱི་བཀའ་ཁྲིད་གནང་དགོས་པའི་བཀའ་ཕེབས་པ་བཞིན། གྲུབ་དབང་མཉན་པ་རིན་པོ་མཆོག་ནས་ཀྱང་སྤྱིར་འབྲུག་ཕྱོགས་སུ་དམ་པའི་ཆོས་ཀྱི་མཛད་པ་བསྐྱངས་བཞིན་མཆིས་མོད། འོན་ཀྱང་གང་གི་དཔལ་ལྡན་རྩ་བའི་བླ་མ་དམ་པའི་བཀའ་བཟང་སྤྱི་བོར་ཕེབས་པར་དབྱར་གྱི་རྔ་གསང་སྒྲོགས་པ་ལྟར་ཆེས་ཐུགས་མཉེས་པ་ཆེན་པོའི་སྒོ་ནས་སྔོན་འགྲོའི་བཀའ་ཆོས་སྩལ་བར་མཛད་པའི་ཞལ་བཞེས་བཟང་པོ་གནང་བར་མཛད།
དེས་ན་ཕྱིི་ལོ་ ༢༠༡༩ ཕྱི་ཟླ་ ༡ ཚེས་ ༩ སྔ་དྲོའི་ཆོས་ཐུན་དང་པོར་༸སྐྱབས་རྗེ་རིན་པོ་ཆེ་གནས་མཆོག་རྡོར་གདན་རྒྱལ་ཡོངས་བཀའ་བརྒྱུད་སྨོན་ལམ་ཆེན་མོའི་གར་སྟེགས་སུ་སེར་སྦྲེང་དང་བཅས་ཞབས་སོར་འཁོད་རྟིང་དབུ་མཛད་ཆེན་མོ་མཆོག་ནས་གསུང་ཆོས་ཀྱི་སྔོན་འགྲོ་ཞལ་འདོན་དབུ་ཚུགས། དེ་ནས་དད་ལྡན་སྦྱིན་བདག་འགའ་ནས་མནྜལ་རྟེན་གསུམ་འདེགས་འབུལ་ཞུས་ཤིང་མཐར་༸སྐྱབས་རྗེ་རིན་པོ་ཆེ་མཆོག་ནས་བཀའ་ཆོས་དངོས་གཞི་དབུ་འཛུགས་གནང་། དེ་ཡང་ཐོག་མར་རིན་པོ་མཆོག་གི་ཞལ་སྔ་ནས། འདས་པའི་ལོ་དུ་མའི་རིང་ལ་ཁམས་གསུམ་འགྲོ་བའི་དེད་དཔོན་ཆེན་པོ་སངས་རྒྱས་ཀརྨ་པ་མཆོག་གིས་དབུ་ཁྲིད་མཛད་ནས་གནས་མཆོག་རྡོར་གདན་དུ་རྒྱལ་ཡོངས་བཀའ་བརྒྱུད་སྨོན་ལམ་ཆེན་མོ་ལོ་ལྟར་བཞིན་ཚུགས་བཞིན་མཆིས་མོད། འོན་ཀྱང་སྨོན་ལམ་ཆེན་མོའི་དུས་ཚོད་ཕལ་མོ་ཆེ་བ་ནམ་དུས་དགུན་ཁར་འཁེལ་སྟབས་དགུན་དུས་སུ་འབྲུག་ནང་དུ་༸སྐྱབས་རྗེ་རིན་པོ་ཆེ་ཉིད་དམ་པའི་ཆོས་པྱོགས་ཀྱི་མཛད་སྒོ་དུ་མ་ཞིག་ཡོད་པ་དང་། ལྷག་པར་ཏུ་ལོ་ཤས་སྔོན་ནས་༸སྐྱབས་རྗེ་རིན་པོ་ཆེ་གང་གི་སྐུ་གཟུགས་གསལ་ཐང་མ་བྱུངབའི་སྐུ་ངལ་བརྟེན་ནས་བཀའ་བརྒྱུད་སྨོན་ལམ་བཅར་ཐུབ་མེད་པ་དང་། འོན་ཀྱང་ད་ལན་༸རྒྱལ་དབང་ཡིད་བཞིན་ནོར་བུ་མཆོག་གིས་ཕྱག་བྲིས་བརྒྱུད་ནས་བཀའ་བརྒྱུད་སྨོན་ལམ་གྱི་སྔོན་འགྲོའི་གསུང་ཆོས་སྐབས་སུ་ངེས་པར་དུ་གསུང་ཆོས་ཀྱི་བཀའ་དྲིན་སྩལ་དགོས་པ་དང་། གསུང་ཆོས་ཀྱི་གཞུང་དེའང་ཤར་ཆུ་བོ་གངྒཱའི་འགྲམ་དུ་རྗེ་བཙུན་ཏི་ལོ་པས་དཔལ་ནཱ་རོ་པ་ལ་གདམས་པའི་ཕྱག་ཆེན་གངྒཱ་མ་དེ་ཉིད་བཀའ་ཁྲིད་བསྡུས་པ་ཞིག་གིས་སྒོ་ནས་གནང་བར་མཛད་ན་རྟགས་དང་རྟེན་འབྲེལ་སོགས་པའི་ཆེས་དགེ་མཚན་ཆེན་པོ་ཡོད་པའི་བཀའ་ཕེབས་ཡོད་ཅེསགསུངས།
དེ་ནས་གཞུང་དངོས་གཞིའི་བཀའ་ཆོས་དབུ་མ་འཛུགས་པའི་སྔ་རོལ་དུ། ༸སྐྱབས་རྗེ་རིན་པོ་ཆེ་གང་ཉིད་ནས་སྤྱིར་གནས་ལུགས་ཕྱག་རྒྱ་ཆེན་པོ་བཀའ་ཁྲིད་མཛད་པའི་བླ་མ་དང་སློབ་མའི་གཉིས་ཀྱི་སྒོ་ནས་མཚན་ཉིད་ཇི་ལྟར་ཚང་དགོས་པ་དང་། གནས་ལུགས་ཕྱག་རྒྱ་ཆེན་པོ་དམ་ཆོས་ཟབ་མོ་ལ་ཉམས་ལེན་གནང་བར་མཛད་ན་ལྟ་ཅི་སྨོས། མཚན་ཙམ་ཞིག་ཐོས་པ་དེ་ཡང་སྔོན་བསྐལ་པ་དུ་མར་ཚོགས་བསགས་པའི་འབྲས་བུ་ཡིན་པས་ཆེས་བསྐལ་པ་བཟང་པོ་ཡིན་པ་དང་། དེ་བཞིན་ཐེག་པ་ཐུན་མོང་གི་དམ་པའི་ཆོས་ཀྱི་ཉམས་ལེན་གནང་ཚེ་དང་པོར་བླ་མ་བསྟེན་ཚུལ། བླ་མ་བསྟེན་ནས་དམ་པའི་ཆོས་ཀྱི་ཉམས་ལེན་མཐིལ་ཕྱིན་པར་མཛད་ནས་དཔལ་ལྡན་རྩ་བའི་བླ་མ་དང་རྒྱལ་བ་སྲས་དང་བཅས་པའི་ཐུགས་ཀྱི་བཞེད་པ་ཇི་ལྟར་སྐོང་དགོས་པའི་ཚུལ་ཆེས་ཟབ་ཅིང་རྒྱས་ལ་གནད་ལ་འཁེལ་བར་བཀའ་ཆོས་ཟབ་རྒྱས་སྩལ་གནང།
དེ་ལྟར་ཟབ་ཅིང་རྒྱ་ཆེ་བའི་སྤྱི་དོན་གྱི་བཀའ་ཁྲིད་མཛད་རྟིང་གཞུང་དངོས་གཞི་དབུ་ཚུགས་གནང་བར་མཛད། དེ་ཡང་ཕྱག་ཆེན་གངྒཱ་མའི་གཞུང་དེ་ཉིད་༸སྐྱབས་རྗེ་རིན་པོ་ཆེ་མཆོག་གང་ནས་ཞུ་བའི་བླ་མ་ནི་༸སྐྱབས་རྗེ་དིལ་མགོ་མཁྱེན་བརྩེ་རིན་པོ་ཆེ་སྐུ་གོང་མའི་སྐུ་མདུན་ནས་ཞུས་པ་དང་། དིལ་མགོ་མཁྱེན་བརྩེ་རིན་པོ་ཆེ་མཆོག་གིས་དཔལ་༸རྒྱལ་བའི་དབང་པོ་སངས་རྒྱས་ཀརྨ་པ་སྐུ་ཕྲེང་བཅུ་དྲུག་པ་རང་བྱུང་རིག་པའི་རྡོ་རྗེ་སྐུ་མདུན་ནས་ཞུས་པས་བརྒྱུད་པ་ནི་ཆེས་གཙང་ལ་བར་མ་ཆད་པའི་བརྒྱུད་པ་རིན་པོ་ཆེ་ཡིན་ཞིང་། དེས་ན་ཆོས་ཟབ་མོ་འདི་ནི་རྟོགས་པས་བདག་རྒྱུད་གྲོལ། ཐུགས་རྗེས་གཞན་རྒྱུད་གྲོལ་བའི་དམ་པ་གོང་མ་ནས་བརྒྱུད་པ་ཡིན་པས་ཆོས་ཞུ་བ་རྣམས་ལ་ཕན་ངེས་ཡིན་ཞེས་གསུངས།
དེ་ནས་གཞུང་དངོས་གཞིའི་ལ་ཀླད་ཀྱི་དོན་། གཞུང་གི་དོན། མཇུག་གི་དོན་བཅས་ས་བཅད་གསུམ་ཡོད་པ་ལས་ཀླད་ཀྱི་དོན་ལ་དང་པོ་མཚན་སྨོས་པའི་སྐབས་སུ། ༸སྐྱབས་རྗེ་རིན་པོ་ཆེ་ཡི་ཞལ་སྔ་ནས། “སྤྱིར་བཏང་ཕྱག་རྒྱ་ཞེས་པའི་ཚིག་འདི་ལ་ནམ་མཁའ་མཛོད་ཀྱིས་ཞུས་པའི་མདོ་ཡི་ནང་དུ། དེ་བཞིན་གཤེགས་པ་པྱག་རྒྱས་བཏབ་པ་དེ་ནི་ཞེས་པ་གསུངས་ཡོད། དེ་ནི་ཕྱག་ཆེན་ཟླ་བའི་འོད་ཟེར་ནང་དུའང་ཆེས་གསལ་པོ་ཡོད། སྤྱིར་བཏང་ཕྱག་རྒྱ་ཆེན་པོ་ཞེས་པ་ཚང་མས་མཁྱེན་མོད། འོན་ཏང་ནམ་མཁའ་མཛོད་ཀྱི་མདོ་ལྟར་ན། མདོ་དེའི་ནང་དུ་ཕྱག་རྒྱ་ཞེས་པའི་དོན་གང་ཞིག་ཡིན་ཞེ་ན། དེ་བཞིན་ཉིད་དབྱེར་མེད་པ་དེ་ནི་པྱག་རྒྱ་སྟེ། དེའི་སྐབས་སུ་དེ་བཞིན་ཉིད་ཞེས་པའི་དོན་ནི་སེམས་ཅན་ཐམས་ཅད་ཀྱི་སེམས་ཀྱི་གནས་ལུགས་ལ་ཡོད་པའི་གདོད་མའི་གཤིས་ཀྱི་རང་བབས་དེ་ཉིད་ལ་བཤད། དེ་ལ་ཕྱག་རྒྱ་ཆེན་པོའི་སྐབས་སུ་མཚན་མ་བཅོས་པ། གཤིས། སོ་མ། རང་བབས། རྫོགས་པ་ཆེན་པོའི་སྐབས་སུ་རང་བྱུང་གི་རིག་པ། ཀུན་ཏུ་བཟང་པོ་ལ་སོགས་པའི་མཚོན་བྱེད་ཀྱི་རྣམ་གྲངས་ནི་དུ་མ་ཡོད་མོད། འོན་ཏང་མཚོན་བྱ་དོན་ལ་གཅིག་མ་གཏོགས་མེད་པ་དེ་བཞིན་ཉིད་ཡིན། དེ་ཡང་དེ་བཞིན་ཞེས་པ་ནི་གནས་ལུགས་རྒྱུ་རྐྱེན་གྱིས་མ་བྱས་པའི་རང་བབས། སོ་མ། གཤིས། གཉུག་མ་ཞེས་བཤད། ཉིད་ཅེས་པ་ནི་ངོ་བོའམ་རང་བཞིན་གྱི་ཆ་ནས་དེ་ལྟ་བུའི་ཡོན་ཏན་ལ་སེམས་ཅན་དང་སངས་རྒྱས་གཉིས་ལ་ཁྱད་པར་མེད་པར་གསུངས། དབྱེར་མེད་པ་ཞེས་པ་ནི། དེ་ལྟ་བུའི་ཡོན་ཏན་དེ་ཉིད་རྒྱུ་རྐྱེན་དང་ལམ་ལ་སོགས་པ་གང་གིས་ཀྱང་གསར་དུ་བཟོ་རྒྱུ་མེད་པ་གནས་ལུགས་ཇི་ལྟར་གནས་པ་དེ་བཞིན་རྟོགས་པ་ལ་དབྱེར་མི་ཕྱེད་པ་ཞེས་སོ།” ཞེས་ནམ་མཁའ་མཛོད་ཀྱི་མདོའི་དགོངས་པ་ལྟར་བྱས་ནས་ཕྱག་རྒྱ་ཞེས་པའི་དོན་ཆེས་ཟབ་ཅིང་རྒྱ་ཆེ་ལ་ཆེས་གསལ་བར་གསུངས། དེ་བཞིན་དུས་འཁོར་དཀའ་འགྲེལ། རྒྱུད་བླ་མ། ཕྱག་ཆེན་གྱི་ཁྲིད་ཡིག་རྣམས། བཀའ་བརྒྱུད་གོང་མ་དག་གི་གསུང་ཟབ་མོ་དུ་མ་ལུང་འདྲེན་མཛད་ནས་ཕྱག་རྒྱ་ཆེན་པོ་ཞེས་པའི་དོན་བཀའ་ཁྲིད་ཆེས་ཟབ་རྒྱས་མཛད།
མན་ངག་ཅེས་པ་ནི་བླ་མ་རང་གི་གནས་ལུགས་ཕྱག་རྒྱ་ཆེན་པོ་དོན་དེ་ཉིད་ཉམས་སུ་བླངས་ཏེ་ཉམས་རྟོགས་ཁྱད་པར་ཅན་འཁྲུངས་པ་དེ་ཉིད་ཚིག་ལ་སོགས་པའི་སྒྲོ་འདོགས་ཀྱི་མ་བཅིངས་བར་ཐད་ཀར་མ་བཅོས་པར་སློབ་མ་རྣམས་ལ་བསྟན་པ་ལ་མན་ངག་ཅེས་གསུངས།
གཞུང་ནང་དུ་དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །ཞེས་པའི་སྐབས་སུ་སྤྱིར་ཐུན་མོང་དང་དོན་དམ་པའི་སྒོ་ནས་འགྲེལ་སྟངས་མི་འདྲ་བ་གཉིས་ཡོད་པར་གསུངས། དེ་ཡང་ཐུན་མོང་དུ་བཤད་ན་མཁའ་འགྲོ་རྣམས་ཟབ་ཆོས་རྣམས་ཀྱི་བདག་པོ་ཡིན་པ་དང་གསུང་བ་པོ་ཡང་དེ་དག་ཡིན་པས་དེའི་དབང་དུ་བྱས་ནས་ཕྱག་འཚལ་བ་དང་། དོན་དམ་པའི་དབང་དུ་བྱས་ན་རྡོ་རྗེ་ཞེས་པ་ཐབས་དང་།མཁའ་འགྲོ་ཞེས་པ་ཤེས་རབ་སྟོང་པ་ཉིད་ཡིན་པར་གསུངས། དེ་ཡང་འཁོར་འདས་ཆོས་ཐམས་ཅད་དེ་དག་ལ་འདུས་ཤིང་དེ་གཉིས་ཀྱི་ར་བ་ལ་མ་འདས་པ་ཡིན་པས་ཐབས་ཤེས་ཟུང་དུ་འཇུག་པ་ལ་ཕྱག་འཚལ་བ་ཡིན་ཞེས་གསུངས། ཡང་འགྲེལ་བཤད་གཞན་ཞིག་ལ་མཁའ་ཞེས་པ་རྒྱལ་ཡུམ་ཤེས་རབ་ཀྱི་ཕ་རོལ་དུ་ཕྱིན་པ་དང་། འགྲོ་ཞེས་པ་གནས་ལུགས་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཉིད་རྟོགས་ནས་སྤྱོད་ལམ་ཐམས་ཅད་དེའི་ར་བ་ལས་མ་འདས་པ་འགྲོ་བས་འགྲོ་ཞེས་གསུངས།
དེ་ནས་རྩ་བའི་གཞུང་དུ། དཀའ་བ་སྤྱད་ཅིང་བླ་མ་ལ་གུས་པ། །སྡུག་བསྔལ་བཟོད་ལྡན་བློ་ལྡན་ནཱ་རོ་པ། སྐལ་ལྡན་ཁྱོད་ཀྱི་བློ་ལ་འདི་ལྟར་བྱོས། །ཞེས་པའི་སྐབས་དེ་ཉིད་སྤྱིར་བཏང་མན་ངག་གཞན་ལ་འདོམས་པར་དམ་བཅའ་བ་ཡིན་ཞེས་གསུངས། ལྷག་པར་ཏུ་གཞུང་འདིས་གནས་ལུགས་ཕྱག་རྒྱ་ཆེན་པོའི་དོན་ཉམས་སུ་ལེན་པའི་སློབ་མ་རྣམས་མཚན་ཉིད་བཞི་ཚང་དགོས་པ་དང་། འདི་ལྟར་མཚན་ཉིད་བཞི་པོདེ་ཡང་། ༡ དཀའ་བ་སྤྱད་པ། ༢ བླ་མ་ལ་གུས་པ་ཡོད་པ། ༣ སྡུག་བསྔལ་ལ་བཟོད་པ། ༤ ཤེས་རབ་དང་ལྡན་པ་བཞི་ཡིན་ཞེས་གསུངས། དེ་ལྟར་མཚན་ཉིད་བཞིའི་ནང་ནས་ཀྱང་གནད་ཆེ་ཤོས་དང་གལ་ཆེ་ཤོས་ཤེས་རབ་ཡིན་པ་དང་། རྒྱུ་མཚན་ནི་ཤེས་རབ་ལྡན་ན་དཀའ་བ་སྤྱད་པ་སོགས་གཞན་གསུམ་ངང་གིས་བྱུང་བར་གསུངས། དེ་ལྟར་མཚན་དང་འགྱུར་ཕྱག མན་ངག་གཞན་ལ་འདོམས་པར་དམ་བཅའ་རྣམས་ལ་བཀའ་ཁྲིད་ཆེས་ཟབ་རྒྱས་མཛད་ནས་སྔ་དྲོའི་ཆོས་ཐུན་དང་པོ་ལེགས་པར་གྲུབ།
དེ་བཞིན་ད་ལན་གསུང་ཆོས་སྐབས་སུ་ཆོས་ཞུ་བ་སྒྲུབ་བརྒྱུད་ཀརྨ་ཀཾ་ཚང་རང་གི་དགེ་འདུན། རི་བོ་དགེ་ལྡན་པའི་དགེ་བའི་བཤེས་གཉེན། ཆོས་བརྒྱུད་གཞན་ནས་ཕེབས་པའི་བཙུན་པ་དང་བཙུན་མ། དེ་བཞིན་ཧི་མཱ་ལ་ཡ་གཙོས་པའི་འཛམ་གླིང་ཤར་ནུབ་ཀྱི་ཡུལ་གྲུ་དུ་མ་ནས་ཕེབས་པའི་དད་ལྡན་མི་དམངས་བཅས་ཚོགས་བཅར་བ་སྟོོང་ཕྲག་དུ་མ་ཕེབས་ཡོད། དེ་ལྟར་ཉིན་དང་པོ་ཆོས་ཐུན་དང་པོའི་བཀའ་ཁྲིད་དང་གནས་ཚུལ་སྙིང་བསྡུས་ཞིག་གངས་ལ་ཉི་ཤར་ནས།

20190109AM_The Ganges Mahamudra_Teaching 6-1

 

Right-Column-Pics23.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་