བཀའ་བརྒྱུད་སྨོན་ལམ་ཐེངས་སུམ་ཅུ་རྩ་དྲུག་གི་དངོས་གཞི་གསུང་ཆོས་ཉིན་དང་པོ།

ཐོག་མར་སྨོན་ལམ་ཐེངས་འདིའི་གཏོང་ཕོད་ཅན་གྱི་སྦྱིིན་བདག་སྙེ་ཤང་བ་རྣམ་པ་དང་། དད་ལྡན་ཆོས་ཞུ་བ་འགའ་ནས་མནྜལ་རྟེན་གསུམ་འདེགས་འབུལ་ཞུས། དེ་ནས་འདུས་པ་ཀུན་ལ་རྟེན་འབྲེལ་མཚོན་བྱེད་གསོལ་ཇ་དང་འབྲས་སིལ་དྲངས་རྗེས། ༸སྐྱབས་རྗེ་གོ་ཤྲི་རྒྱལ་ཚབ་རིན་པོ་ཆེས་བློ་སྦྱོང་དོན་བདུན་མའི་གསུང་ཆོས་དབུ་འཛུགས་མཛད། རྒྱལ་དབང་མཆོག་གི་བཀའ་ཕེབས་པ་ལྟར་ངོས་ཉིད་ནས་བློ་སྦྱོང་དོན་བདུན་མ་མདོ་ཙམ་ཞུ་རྒྱུ་ཡིན། བསམ་པ་བྱང་ཆུབ་མཆོག་ཏུ་སེམས་བསྐྱེད་དེ་གསན་པར་འཚལ། སྤྱིར་ཆོས་འགོར་ཞུགས་པ་ནས་བྱང་ཆུབ་མཆོག་ཏུ་སེམས་བསྐྱེད་དགོས། རང་ཅག་ཆུང་དུས་དགེ་ཚུལ་སློང་སྒྲུབ་པ་དང་། ཁྱིམ་པ་རྣམས་པས་དགེ་བསྙེན་སོགས་སྡོམ་པ་གང་སྒྲུབ་ཀྱང་བྱང་ཆུབ་མཆོག་ཏུ་སེམས་བསྐྱེད་ནས་བསྒྲུབ་དགོས། དེ་བཞིན་གསང་སྔགས་ཀྱི་དབང་ཞུ་ནའང་བྱང་ཆུབ་མཆོག་ཏུ་སེམས་བསྐྱེད། དེ་སྐབས་བྱང་སེམས་ཁྱད་པར་ཅན་ཞིག་བསྐྱེད་དགོས་པར་གསུངས་ཡོད། དང་པོ་སངས་རྒྱས་དང་གྲུབ་ཐོབ་རྣམ་པ་ཞལ་བཞུགས་སྐབས་རིགས་དང་ཁམས་ལ་བརྟགས་ནས་དབང་ཁྲིད་སོགས་སྩོལ་བཞིན་ཡོད། དེང་སང་སེམས་ཅན་གྱི་རིགས་ཁམས་བརྟག་པར་དཀའ། དེ་བཞིན་བརྟག་མཁན་བླ་མ་ཡང་འབྱུང་དཀའ། དེ་ཡིན་སྟབས་མོས་པ་གཙོ་བོ་ཡོད་མེད་ལ་བརྟེན་ནས་གནང་གི་ཡོད། མོས་པ་དེ་འགངས་ཆེན་པོ་ཡིན། མོས་པ་ལ་བརྟེན་ནས་མི་རིང་བར་རིགས་དང་ལྡན་པར་འགྱུར། སེམས་བསྐྱེད་གོང་དུ་སྤེལ་དགོས། མ་སྤེལ་ན་མི་རུང་བ་ཡིན། དེ་སྤེལ་བ་ལ་གཞན་དོན་མ་གཏོགས་རང་དོན་སྐད་ཅིག་ཙམ་ཡང་མི་སྐྱེ་བ་ཞིག་དགོས། བྱང་ཆུབ་སེམས་དཔས། གཞན་དོན་བསྒྲུབས་ནས་སྐད་གྲགས་མ་བྱུང་ནའང་གཞན་དོན་སྒྲུབ་པ་དང་། རང་དོན་བསྒྲུབས་ནས་སྐད་གྲགས་བྱུང་ནའང་རང་དོན་མ་བསྒྲུབས་པ་གཞན་དོན་སྒྲུབ་ཀྱི་ཡོད། གཞན་ལ་ཕན་པའི་ནོར་འབྱུང་བར་ཤོག །གཞན་ལ་མི་མཁོ་བའི་ནོར་མི་འབྱུང་བར་ཤོག་ཅེས་པ་དང་། དམྱལ་བ་མནར་མེད་པའི་སྡུག་བསྔལ་མྱངས་ནས་སེམས་ཅན་གཞན་ལ་ཕན་ཐོགས་ན། དེའི་སྡུག་བསྔལ་མྱོང་བར་ཤོག་ཅེས་སྨོན་ལམ་འདེབས་ཀྱི་ཡོད། མདོ་སྡེ་རྒྱན་ལས། གལ་ཏེ་མནར་མེད་པ་ལའང་དགར་འཇུག་ན། ཞེས་དང་། མཐོང་ལམ་ཐོབ་པ་དང་མངོན་ཤེས་སྒྲུབ་པ་སོགས་ཀྱང་རང་དོན་སྤུ་ཙམ་མེད། གཞན་དོན་ཁོ་ནའི་ཆེད་སྒྲུབ་ཀྱི་ཡོད། བསྐལ་པ་བཟང་པོ་སྟོང་རྩ་གཉིས་ཀྱི་སངས་རྒྱས་ཐམས་ཅད་སེམས་ཅན་ཕན་པའིི་དུས་དེ་རང་སངས་རྒྱས་པ་རེད། དེ་བཞིན་མ་འོངས་པའི་སངས་རྒྱས་བྱམས་པ་མགོན་པོ་ཡང་དུས་དེ་རང་མ་གཏོགས། དེ་སྔོན་སངས་མི་རྒྱས་ཏེ། གདུལ་བྱ་འགའ་ཞིག་གི་དོན་ལྷག་པས་སོ། དིང་སང་སེམས་ཅན་ཕལ་ཆེར་རང་དོན་ཁོ་ན་སྒྲྲུབ་པར་སེམས་ཀྱི་ཡོད། འོན་ཀྱང་རང་དོན་སྒྲུབ་མི་ནུས་ཏེ། སྤྱོད་འཇུག་ལས། བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །ཞེས། རང་ལ་བདེ་བ་འབྱུང་བའི་ཆེད། སེམས་ཅན་གྱི་སྲོག་གཅོད་པ་དང་། གཞན་ལ་ཆགས་སྡང་དང་ཕྲག་དོག་བྱེད་པ། དེར་བརྟེན་སླར་ཡང་སྡུག་བསྔལ་བྱུང། དེ་ཉིད་ལས། སྡུག་བསྔལ་འདོར་འདོད་སེམས་ཡོད་ཀྱང་། སྡུག་བསྔལ་ཉིད་ལ་མངོན་པར་རྒྱུགས། །ཞེས་དང་། དེ་དག་ཐམས་ཅད་གཏི་མུག་རྨོངས་པ་ལ་བརྟེན་ནས་འབྱུང་གི་ཡོད། དེ་ལྟའི་རྨོངས་པའི་བསམ་པ་སྤངས་ནས་བྱམས་པའི་བློ་སྐྱེད་བྱེད་གདམས་ངག་དེ། སངས་རྒྱས་བཅོམ་ལྡན་འདས་ཀྱིས་བྱམས་པ་མགོན་པོ་ལ་གནང། དེ་ནས་བླ་མ་རྣམས་ལ་བརྒྱུད་ནས་ཇོ་བོ་རྗེ་དཔལ་ལྡན་ཨ་ཏི་ཤས་གསན། ཁོང་བོད་པ་ཕེབས་ཏེ་གདམས་ངག་བཀའ་དྲིན་ཆེན་པོ་སྩལ་གནང་མཛད། དེ་ནི་ཉམས་ལེན་བྱེད་པ་ལ་དང་པོ་སྔོན་འགྲོའི་ཉམས་ལེན་གནང་དགོས། དེ་ཡང་བླ་མའི་བྱིན་རླབས་བརྟེན་ནས་ཉམས་ལེན་གནང་ནུས་པ་དང་། དེའི་འབྲས་བུ་ཐོབ། དེ་ཡང་སངས་རྒྱས་བཅོམ་ལྡན་འདས་ཀྱིས་ཡུལ་ཝཱ་རཱ་ཎ་སཱི་དྲང་སོང་ལྷུང་བའི་རི་དྭགས་ཀྱི་ནགས་སུ་ཐོག་མར་འཁོར་ལྔ་སྡེ་བཟང་པོར་ཆོས་བསྟན། དེ་ཉིད་དུ་དགྲ་བཅོམ་ཐོབ་པ་དེ་སངས་རྒྱས་ཀྱི་ཐུགས་རྗེ་བྱིན་རླབས་ལ་བརྟེན་ནས་བྱུང་། དང་པོ་སྐྱིལ་ཀྲུང་དུ་བཞུགས། རང་གི་སྤྱི་བོར་པདྨ། ཟླ་བ། དེའི་སྟེང་དུ་རྩ་བའི་བླ་མ། ཞལ་འཛུམ་པ། སྐུ་གཟི་བརྗིད་དང་ལྡན་པ། ཐུགས་དམིགས་མེད་སྙིང་རྗེས་སེམས་ཅན་ལ་གཟིགས་ནས་བཞུགས་པ། སྐྱིལ་མོ་ཀྲུང་གིས་བཞུགས་པ། བླ་མ་སངས་རྒྱས་དང་རྒྱལ་བ་བྱམས་པ་སོགས་བླ་མ་ཀུན་འདུས་ཀྱི་ངོ་བོར་སྒོམ། དེ་ནས་བླ་མ་རིན་པོ་ཆེ་བདག་ལ་བྱམས་སྙིང་རྗེ་དང་བྱང་ཆུབ་སེམས་བསྐྱེད་པར་བྱིན་གྱིས་བརླབ་ཏུ་གསོལ་ཞེས་ལན་མང་གསོལ་བ་འདེབས་དགོས། རང་ཉིད་ཀྱི་སྙིང་ཁར་འོད་ཀྱི་གོང་བུ་གསལ་འདེབས། གསོལ་བ་བཏབ་པས་བླ་མ་འོད་དུ་བཞུས་ནས་རང་གི་སྙིང་གའི་གོང་བུར་རྟག་ཏུ་བྱིན་གྱིས་བརླབས་ནས་བཞུགས་པར་བསམ། དེ་རྗེས་དལ་འབྱོར་རྙེད་དཀའ་དང་། འཆི་བ་མི་རྟག་པ་བསྒོམ་དགོས། ལྷའི་རྒྱལ་པོ་ཚངས་པ་དང་བརྒྱ་བྱིན་སོགས་ལས་ཀྱང་བསོད་ནམས་ཆེ་བ་བསགས་ཏེ་རྙེད་དགོས་པས་དལ་འབྱོར་རྙེད་དཀའ་བར་བསམ། ཉིན་རེ་བཞིན་འཆི་བར་ཉེ་བས་འཆི་བ་མིི་རྟག་པར་བསམ། དེ་ནིི་སེམས་ཅན་ཐམས་ཅད་རང་གི་མ་དང་བུར་བྱེད་མ་མྱོང་གཏན་ནས་མེད། བྱ་བྱིའུ་དུད་འགྲོ་སོགས་སྲོག་ཆགས་ཐམས་ཅད་རང་གི་མ་དང་བུ་བྱས་པ་ཤ་སྟག་ཡིན། དཔེར་ན། ད་ལྟ་བའི་ཕ་མས་རང་ལ་དང་པོ་ལྟོ་གོས་བྱིན། བར་དུ་སློབ་གྲྭ་སོགས་ཀྱི་མཐུན་རྐྱེན་འགྲོ་གྲོན་སྦྱར། མཐར་ལས་ཀ་བཟང་པོ་འཐོབ་པར་བྱས་ནས་སྐུ་དྲིན་ཆེན་པོ་བསྐྱངས་གནང། འོན་ཀྱང་ཕ་མ་གྲོངས་ནས། སྐྱེ་བ་ཕྱི་མ་རིགས་དྲུག་གང་དུ་སྐྱེས་ཀྱང་ཆ་མ་འཚལ། རང་དང་ཉེ་བར་སྐྱེ་བ་བཞེས་ཡོད་ནའང་ངོ་མི་ཤེས། དེ་བཞིན་སེམས་ཅན་ཐམས་ཅད་རང་གི་ཕ་མ་བུ་ཕྲུག་བྱས་ཟིན་ཀྱང་ངོ་མ་ཤེས་པ་ཡིན། དེས་ན་བཀའ་དྲིན་བསྐྱང་དགོས། གདམས་ངག་འདིར་དོན་དམ་བྱང་ཆུབ་སེམས་སྔོན་དུ་བསྒོམས་ནས། ཀུན་རྫོབ་བྱང་ཆུབ་སེམས་རྗེས་ལ་སྒོམ་པ་གསུངས་ཀྱི་ཡོད། དང་པོ་དོན་དམ་བྱང་ཆུབ་སེམས་སྒོམ་པ་ལ། དམིགས་རྟེན་ལུས་གནས་ལ་དབུགས་ཉེར་གཅིག་མ་འཁྲུགས་པར་སེམས་གཏད་དགོས། འཁྲུགས་ན་རྣམ་རྟོག་མི་བརྟན་པར་འགྱུར། སྣང་བ་ཐམས་ཅད་རྒྱུ་དང་རྐྱེན་ལས་འབྱུང་བ་དང་། འགྱུར་བའམ་རྙིང་པར་ཕྱིན་པས་རྨི་ལམ་ལྟ་བུར་སྒོམ་དགོས། སྣང་བ་ཙམ་མ་ཟད། མཐོང་བྱེད་སེམས་ཀྱང་བདེན་པ་མེད། གང་ནས་སྐྱེ། གང་ལ་གནས། གང་དུ་འགག་དཔྱད་ན་མི་རྙེད། དེ་ལྟར་དཔྱད་མཁན་ཡང་རང་བཞིན་གྱིས་མ་གྲུབ། གཉེན་པོ་ཉིད་ཀྱང་མ་གྲུབ། གཉེན་པོ་ཉིད་ཀྱང་རང་སར་གྲོལ་ཞེས། སེམས་དེ་ཀུན་གཞིའམ། དེ་བཞིན་སྙིང་པོའི་ངང་དུ་གཞག་དགོས། སྒོམ་མི་ཐུང་བ་ཞིག་བསྐྱོན། སྤྱི་བོའི་སྟེང་དུ་བླ་མ་སྒོམ། དེ་ལ་གསོལ་བ་བཏབ་པས། སྙིང་གར་འོད་དུ་བཞུས་སོང་བསམ་ནས་སྐར་ཆ་ལྔར་སྒོམ་དགོས། དེ་ནས་ཉིན་དང་པོའི་ཆོས་ཐུན་མཇུག་ལེགས་པར་གྲུབ་བོ།། བསོད་ནམས་དབང་རྒྱལ་གྱིས་ཕབ།

20190114AM_Monlam Day 1

Right-Column-Pics13.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་