བཙུན་མ་རྣམས་ཀྱི་འཕྲོད་བསྟེན་ཞབས་ཞུའི་སྦྱོང་བརྡར་ལོ་བཞི་པ།

ས་གནས། སྒར་ཆེན་བསྟི་གནས་ཁང།
དུས་ཚོད། ཕྱི་ལོ་ ༢༠༡༩ ཟླ་བ་དང་པོའི་ཚེས་ ༢༧ ཉིན།

འཕྲོད་བསྟེན་ཞབས་ཞུའི་སྦྱོང་བརྡར་ལས་རིམ་འདི་ཉིད་འཕགས་མ་བདེ་ཆོས་མའི་དགུན་ཆོས་སྐབས་གཉིས་པར་ དབུ་འཛུགས་ཞུས་ཞིང་། ལོ་ཤས་ནར་ལུས་ཀྱིས་འདི་ལོ་སླར་ཡང་མཇུག་མཐུད་ཞུས། དེ་ཡང་རྒྱ་གར་ནས་ར་ལང་ དང་ཏི་ལོ་ཕུག་གི་བཙུན་དགོན་གཉིས་དང་། བལ་ཡུལ་ནས་ཀརྨ་ལེགས་བཤད་གླིང་། ཏཱ་རཱ་ཨ་བྷེ། འོད་གསལ་ཀརྨ་ ཐེག་མཆོག་གླིང་། བསམ་གཏན་གླིང་བཅས་བཙུན་དགོན་བཞི་སྟེ་ཡོངས་བསྡོམས་བཙུན་དགོན་ཁག་དྲུག་ནས་བཙུན་ མ་སུམ་ཅུ་ལ་ཉེ་བ་འཕྲོད་བསྟེན་ཞབས་ཞུའི་སྦྱོང་བརྡར་གྱི་ལས་རིམ་འདིར་ཞུགས་ཡོད།

འཆར་འགོད་ལས་གཞི་འདི་ཉིད་ཐེ་ཝན་ནས་ཡིན་པའི་གཞུང་འབྲེལ་མ་ཡིན་པའི་ཚོགས་པའི་སྤྱི་ཁྱབ་འགན་འཛིན་ སྐུ་ཞབས་ Dr Jeffrey Chen དང་དཔལ་༸རྒྱལ་དབང་ཀརྨ་པ་མཆོག་རྣམ་གཉིས་ཐུན་མོང་ནས་ནས་གོ་སྒྲིག་མཛད་ པ་ཞིག་ཡིན། ཐེ་ཝན་གྱི་འཕྲོད་བསྟེན་ཚོགས་པ་གང་ཞིག་གི་དམིགས་ཡུལ་༼ང་ཚོས་ལས་དོན་དེ་ཉིད་བྱམས་བརྩེའི་ ཕྱིར་བྱེད།༽ཅེས་པ་དེ་ཉིད་ནས་ལས་དོན་དེ་ཉིད་ཐོག་མར་རྡོར་གདན་དུ་མཆིས་པའི་ཕྱི་རྒྱལ་མི་རིགས་ཀྱི་ནང་ཆོས་ སློབ་ཡུལ་བསྟི་གནས་ཁང་ (Root Institute) ཞེས་པ་དེ་ཉིད་དུ་སློབ་སྟོན་ཞུས་པ་དང་། དེ་བཞིན་བྷང་ལ་དེཤ་ནང་མཆིས་པའི་ནང་པའི་དགོན་སྡེ་ཞིག་དང་། གཞན་ཡང་ཚོགས་པ་དེ་ཉིད་ཀྱི་ལས་འགུལ་ བལ་ཡུལ་དང་།ཏུར་ཀིསྠན། ནུབ་ཨཕ་རི་ཀ་བཅས་སུའང་སྤེལ་བཞིན་ཡོད། ལྷ་རྗེ་ཅེན་མཚན་ལྡན་གྱིས་གྲོང་གསེབ་ ས་ཁུལ་གྱི་ནང་འཕྲོད་བསྟེན་ཞབས་ཞུའི་སྦྱོང་བརྡར་ལས་རིམ་འདི་ཉིད་གོང་འཕེལ་དུ་གཏོང་འདུན་ཡོད་ཅིང་། དེ་བཞིན་དགོན་སྡེ་ཁག་དང་བཙུན་དགོན་ནང་དུའང་གོང་འཕེལ་གཏོང་འདུན་མཆིས་སྟབས་དཔལ་༸རྒྱལ་དབང་ ཀརྨ་པ་མཆོག་ནས་ཀྱང་རབ་བྱུང་བཙུན་པ་དང་བཙུན་མ་རྣམས་ཀྱི་འཕྲོད་བསྟེན་དང་འཕྲོད་བསྟེན་དོ་སྐུལ་གོང་འཕེལ་ གྱི་ཐབས་ལམ་མཛད་བཞིན་པར་ཆར་པ་ཆུ་གྲོགས་ལྟ་བུའི་དཔལ་དུ་གྱུར་ཏེ་མཉམ་ལས་ཀྱིས་ཧི་མཱ་ལ་ཡའི་ས་ཁུལ་ རྣམས་ལའང་འཕྲོད་བསྟེན་དོ་སྐུལ་སྦྱོང་བརྡར་ལས་གཞིའི་ལས་འགུལ་སྤེལ་རྒྱུ་བྱུང་བ་ལྟར་དགེ་འདུན་རྣམས་ལ་སྦྱོང་ བརྡར་ཟུར་དུ་ཐོབ་བཞིན་པ་དང་། བཙུན་མ་རྣམས་ལ་འཕྲོད་བསྟེན་གྱི་སྦྱོང་བརྡར་སྤེལ་བའི་དུས་ཡུན་ནི་བཙུན་མའི་ དགུན་ཆོས་སྐབས་འཚམ་ཤོས་ཡིན་པ་ཙམ་མ་ཟད་ཁོར་ཡུག་བདེ་ཞིང་དམིགས་བསལ་འགྲོ་བསྐྱོད་མི་དགོས་པར་ སྟབས་ཅིག་དོན་གཉིས་བྱུང་ཚེ་ལེགས་ཚུལ་གྱི་ལམ་སྟོན་བཀའ་སློབ་ཕེབས་པ་ལྟར་དུས་ཡུན་དེ་ཉིད་དུ་གཏན་ཁེལ་ཞུས།

ལོ་འདིར་ཁོང་ཚོའི་སློབ་ཚན་རྣམས་འཕྲོད་བསྟེན་གྱི་ལས་རིམ་ལ་བྱང་ཆུབ་པའི་སྐྱེས་ཕོ་མོ་དགུ་ནས་དམིགས་ བསལ་ལམ་སྟོན་བགྱིས་ཤིང་། དེ་བཞིན་འཕྲོད་བསྟེན་ཡོ་བྱད་རྣམས་ཀྱང་སྔ་ལོ་ལས་ཆེས་ཡར་ཐོན་ཅན་དུ་གྱུར་ ཡོད་པ་མ་ཟད་སྨན་བཅོས་ཀྱི་རིགས་པའི་གཞུང་ལུགས་ཀྱང་རྣམ་གྲངས་མང་ལ་གོམས་རྩལ་ཆེ་བ་ཡོད། འོན་ཀྱང་ བཙུན་མ་རྣམས་ལ་ཐོག་མའི་རྨང་གཞིའི་ལམ་སྟོན་དང་མཁོ་གལ་ཆེ་བ་རྣམས་གསལ་བཤད་སྤེལ། དེ་ཡང་སྐྱེ་བོ་ གང་ཞིག་ལ་གློ་བུར་རྨས་རྨ་སོགས་བྱུང་ཚེ་ཁྲག་རྒྱུན་འགོག་ཐབས་དང་། ཁྲག་གི་འཐོན་ཚབས་ཉུང་དུ་གཏོང་ཚུལ་གྱི་ ཐབས་ལམ། དེ་བཞིན་རྐང་ལག་འཆུས་པ་དང་རུས་ཆག་སོགས་བྱུང་ཚེ་ཆག་སྦྱོར་གྱི་ཐབས་ལམ་ཇི་ལྟར་བྱ་ཕྱོགས་ སྐོར་དང་། རྨ་དཀྲིས་ཇི་ལྟར་རྒྱབ་ཚུལ། རྨས་སྐྱོན་དང་རུས་ཆག་བྱུང་བ་རྣམས་ལ་རུས་ཟུག་ཆུང་ཕྱིར་རྐང་ལག་ཇི་ལྟར་ དཔྱང་སྟེ་འཇོག་ཚུལ་སོགས་ལམ་སྟོན་བགྱིས་ཡོད།

དེ་བཞིན་བཙུན་མ་རྣམས་ནས་བུད་མེད་དང་འབྲེལ་བའི་ནད་གཞིའི་ལམ་སྟོན་གྱི་སློབ་ཚན་ཚོགས་ཡུན་ལའང་ལྷག་བསམ་ རྣམ་དག་གིས་སྦྱོང་བརྡར་གྱི་གོ་སྐབས་ལྷུག་པོར་བླངས་ཤིང་། དེ་ཉིད་ཀྱིས་རྐྱེན་པས་འབྱུང་འགྱུར་མོ་ནད་ཀྱིས་མནར་ བའི་བཙུན་མ་རྣམས་ལའང་དམིགས་བསལ་ཞབས་ཞུའི་ཕན་ཐོགས་རླབས་ཆེ་སྒྲུབ་ནུས།འདི་ལོ་བཙུན་མ་ཉེར་བརྒྱད་ནས་ འཕྲོད་བསྟེན་ཞབས་ཞུའི་སྦྱོང་བརྡར་གྱི་དགོས་མཁོའི་སློབ་ཚན་རྣམས་གང་ལེགས་གྲུབ་ཅིང་། དེ་ལྟར་གྲུབ་པའི་འབྲས་ རྟགས་སུ་ཁོང་རྣམ་པར་༸སྐྱབས་རྗེ་གོ་ཤྲཱི་རྒྱལ་ཚབ་རིན་པོ་ཆེའི་ཕྱག་ནས་གྲུབ་འབྲས་ཕྱག་འཁྱེར་སྩལ།

 

20190127 Health Worker Training

image-270-3.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་