བླ་མའི་སྲི་ཞུ་བ་དང་། སྨོན་ལམ་ཚོགས་མིར་མཇལ་ཁ།

 

བཀའ་བརྒྱུད་སྨོན་ལམ་ཆེན་མོ་ཐེངས་སོ་བདུན་པའི་དངོས་གཞི་ཉིན་བཞི་པའི་ཉིན་རྒྱབ་བཀའ་བརྒྱུད་སྨོན་ལམ་གྱི་ཚོགས་མི་རྣམས་ལ་༸སྐྱབས་རྗེ་གཽ་ཤྲཱི་རྒྱལ་ཚབ་རིན་པོ་ཆེ་མཆོག་ནས་མཇལ་ཁ་དང་བཀའ་སློབ་སྩལ།
སྔར་༸རྒྱལ་དབང་མཆོག་བཞུགས་སྐབས་ནས་བཀའ་བརྒྱུད་སྨོན་ལམ་གྱི་ཚོགས་མི་རྣམས་ལ་མཇལ་ཁ་དང་བཀའ་སློབ་ཕེབས་སྲོལ་ཡོད་པ་ལྟར་སྤྱི་ལོ་༢༠༢༠-༢-༥ ཉིན་རྒྱབ་ཆུ་ཚོད་གཉིས་པའི་ཐོག་རྡོར་གདན་གཏེར་སྒར་དགོན་གྱི་འདུ་ཁང་གི་སྒོ་ཁར་སྨོན་ལམ་གྱི་ཚོགས་མི་དང་སྲི་ཞུ་བ་རྣམ་པས་རིན་ པོ་ཆེ་ཕེབས་སྒུག་ཞུས་ཞིང་། ཆུ་ཚོད་གསུམ་པའི་ཐོག་རིན་པོ་ཆེ་མཆོག་དངོས་སུ་ཆིབས་སྒྱུར་བསྐྱངས་ཏེ་བཀའ་སློབ་ཕེབས་དོན། ད་སྐབས་བཀའ་བརྒྱུད་སྨོན་ལམ་ཆེན་མོ་ཐེངས་སོ་བདུན་པ་ཐོག་མཐའ་བར་གསུམ་གྱི་དགེ་བ་ལས་ཐོག་མར་དགེ་བ་སོང་ཞིང་ད་མཐའ་མའི་དགེ་བ་ལ་ཐུག་གྲབས་ཡོད། འདིའི་སྐབས་སུ་སྨོན་ལམ་ཡག་པོ་བསྐྱོན་དགོས། སྨོན་ལམ་འདི་ཀརྨ་བཀའ་བརྒྱུད་ཀྱི་བསྟན་པའི་དོན་དང་། བཀའ་བརྒྱུད་ཆེ་བཞི་ཆུང་བརྒྱད་ཐམས་ཅད་ཀྱི་དོན་དང་། སྤྱིར་ནང་པ་སངས་རྒྱས་ཀྱི་བསྟན་པའི་དོན་སོགས་དོན་མང་པོ་ཞིག་ལ་བརྟེན་ནས་སྨོན་ལམ་གནང་གི་ཡོད། དེ་ཙམ་དུ་མ་ཟད་ད་ལྟའི་སངས་རྒྱས་འདིའི་དུས་ཙམ་མ་ཡིན་པར་མ་འོངས་པར་རྒྱལ་བ་བྱམས་པ་དང་། འབྱོན་པར་འགྱུར་བའི་སངས་རྒྱས་སྟོང་རྩ་ལ་སོགས་པའི་མཛད་འཕྲིན་དང་བསྟན་པ་རྒྱས་པའི་དོན་ཡང་རེད། ལྷག་པར་དུ་ད་ལྟ་བཞུགས་བཞིན་པའི་དཔལ་༸རྒྱལ་དབང་ཀརྨ་པ་མཆོག་དང་། དེ་བཞིན་དུ་མ་འོངས་པར་ཀརྨ་པ་སྐུ་ཕྲེང་བརྒྱད་ཙམ་ཕེབས་ཀྱི་ཡོད་པ་རྣམས་ཀྱི་མཛད་འཕྲིན་རྒྱས་པ་ལ་ཕན་གྱི་རེད། ང་ཚོ་ནང་པ་སངས་རྒྱས་པའི་བསྟན་པ་འདི་སེམས་གཙོ་བོར་འཛིན་མཁན་ཞིག་རེད། སེམས་ཀྱིས་གང་བསམ་ན་ཡང་དེ་གཙོ་བོར་བྱེད་ཀྱི་རེད། དེ་ཡིན་དུས་བཀའ་བརྒྱུད་སྨོན་ལམ་ཡག་པོ་ཞིག་ཡོང་ན་བསམ་པའི་རེ་བ་བྱེད་ཅིང་ཞབས་ཞུ་སྒྲུབ་པ་ཡིན་ན་སངས་རྒྱས་བསྟན་པ་ཐམས་ཅད་ལ་ཞབས་ཏོག་ཞུ་ཡི་ཡོད་རེད། སངས་རྒྱས་སྟོང་རྩ་ལ་ཞབས་ཏོག་ཞུ་བཞིན་ཡོད། ཀརྨ་པ་སྐུ་ཕྲེང་རིམ་བྱོན་ཐམས་ཅད་ལ་ཞབས་ཏོག་ཞུ་བཞིན་ཡོད་ཅིང་ཕན་ཐོགས་ཀྱང་ཧ་ཅང་ཆེན་པོ་ཐོབ་རྒྱུ་རེད། དེ་ཙམ་མ་ཡིན་པར་སྨོན་ལམ་གྱི་ནང་དུ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་ཆེད་དུ་སྨོན་ལམ་གནང་དགོས་པར་གསུངས་པ་བཞིན་ནམ་མཁའ་དང་མཉམ་པའི་སེམས་ཅན་ཐམས་ཅད་སངས་རྒྱས་ཀྱིི་གོ་འཕང་ཐོབ་པའི་སྨོན་ལམ་གནང་དགོས་པ་ཡིན། སངས་རྒྱས་ཀྱི་བསྟན་པ་རྒྱས་པར་ཤོག་བསམ་པའི་བསྔོ་བ་དང་སྨོན་ལམ་རྒྱུན་དུ་རྒྱབ་དགོས་རེད། དེ་ལྟར་བྱས་ཚེ་དགེ་བ་རྒྱ་ཆེན་པོ་ཐོབ་རྒྱུ་རེད། ཁྱེད་རང་ཚོས་བཀའ་བརྒྱུད་སྨོན་ལམ་ལ་ཞབས་ཏོག་ཞུ་བའི་སྐབས་སུ་ཞལ་ལག་བཟོ་བ་དང་ཅ་ལག་དབོར་བ་སོགས་ལས་རིགས་རྣམ་པ་དུ་མ་ཡོད་པས་ལས་རིགས་གང་གི་ནང་དུ་ཞུགས་ཀྱང་། ཚོགས་རླབས་པོ་ཆེ་གསོག་བཞིན་ཡོད།
རྒྱལ་དབང་ཡིད་བཞིན་ནོར་བུས་དྲྭ་རྒྱ་བརྒྱུད་རྒྱུན་དུ་ང་རང་ཚོས་ཞབས་ཏོག་གང་ཞིག་ཞུས་པ་གཟིགས་བཞིན་པ་ཡིན་སྟབས་རྒྱལ་དབང་མཆོག་ཀྱང་ཐུགས་དགྱེས་ཚོར་ཆེན་པོ་ཡོང་གི་རེད། ཕྱག་ལས་གང་གནང་བ་བླ་མའི་ཞབས་ཏོག་དང་བསྟན་པ་རྒྱས་པའི་ཆེད་དུ་ཡིན་བསམ་སྟེ་དེ་ལྟར་གནང་ཚེ་དེ་བཞིན་འགྱུར་གྱི་རེད། ཅེས་དང་།
ད་ལྟ་ང་ཚོ་མི་མང་པོ་ཞིག་གིས་ཡིད་བཞིན་ནོར་བུ་ཚུར་ཕེབས་ཏེ་མཛད་འཕྲིན་སྐྱོང་ཐུབ་པའི་རེ་བ་བྱེད་ཀྱི་ཡོད། དེ་བཞིན་ཡིད་བཞིན་ནོར་བུ་ཚུར་ཕེབས་ཏེ་མཛད་འཕྲིན་སྐྱོང་ཐུབ་པའི་སྨོན་ལམ་ཐོབ་དང་ངེས་པར་འགྲུབ་ཀྱི་རེེད། མཐའ་དོན་མ་འོངས་པར་ཁྱེད་རང་ཚོ་སྨོན་ལམ་ཞབས་ཞུ་བ་རྣམ་པ་ཚེ་རིང་བ། ནད་མེད་པ། མི་ཚེ་དོན་དང་ལྡན་པའི་རེ་བ་དང་སྨོན་ལམ་རྒྱག་དགོས་པ་རེད། རྒྱལ་དབང་ཀརྨ་པས་ཀྱང་དེ་ལྟར་གནང་བཞིན་ཡོད། ངས་ཀྱང་སྨོན་ལམ་དེ་བཞིན་ཞུ་རྒྱུ་ཡིན་ཐུགས་རྗེ་ཆེ། ཅེས་སོགས་གསུངས། དེ་མཇུག་རིན་པོ་ཆེ་མཆོག་གཟིམ་ཆུང་དུ་ཆིབས་སྒྱུར་བསྐྱངས། ཚོགས་མི་རྣམས་ལ་༸རྒྱལ་དབང་མཆོག་གི་སྐུ་པར་རེ་དང་བྱིན་རླབས་རེ་གནང་སྟེ་མཇུག་གྲོལ། །

གནས་ཚུལ་ཕྱོགས་བསྡུས་ཙམ་བཀོད་པ་པོ་ནི་ལྷ་ཐོག་ཐུབ་སྦྱིན་ནོ། །

 

 

20200205_Audience Of Guru Sevakas And Monlam Members

Right-Column-Pics33.jpg

བཀའ་བརྒྱུད་སྨོན་ལམ་ཆེན་མོ་ཐེངས་སོ་དྲུག་པ།

Tibetan / English / Chinese •  FrenchGerman • IndonesianKorean • PolishRussianSpanish  • Vietnamese 

སྨོན་ལམ་གསུང་ཆོས།

བློ་སྦྱོང་དོན་བདུན་མའི་བཀའ་ཁྲིད། གོ་ཤྲི་རྒྱལ་ཚབ་རིན་པོ་ཆེ།
ཕྱི་ཟླ་ 1 ཚེས་ 28 ནས་ 30 བར། 2020 ལོ་